Category: Aankhein Shayari

Hasrat hai tujhe samane baithe kabhi dekhun – Kishwar Naheed

hasrat hai tujhe samane baithe kabhi dekhun
main tujh se mukhatib hun tera hal bhi puchun
dil mein hai mulaqat ke khvahish ke dabi aag
mehandi lage hathon ko chupa kar kahan rakhun
jis naam se tune mujhe bachpan se pukara
ik umr guzarne pe bhi wo naam na bhulun
tu ashk hi ban ke meri aankhon mein sama ja
main aaina dekhun to tera aks bhi dekhun
puchun kabhi gunchon se sitaron se hawa se
tujh se hi magar aa ke tera naam na puchun
ae meri tamanna ke sitare tu kahan hai
tu aaye to ye jism shab-e-gam ko na saunpun

Poet of the Poem / Ghazal or Nazam :Kishwar Naheed

Har ek baat pe kahate ho tum ki tu kya hai – Mirza Ghalib

har ek baat pe kahate ho tum ki tu kya hai
tumhin kaho ke ye andaz-e-guftagu kya hai
na shole mein ye karishma na barq mein ye ada
koi batao ki wo shokh-e-tundakhu kya hai
ye rashk hai ki wo hota hai hamasukhan hum se
vagarna khauf-e-badamozi-e-ad kya hai
chipak raha hai badan par lahu se pairahan
hamari jeb ko an hajat-e-rafu kya hai
jala hia jism jahan dil bhi jal gaya hoga
kuredate ho jo ab rakh justaju kya hai
ragon mein daudate phirane ke hum nahi qayal
jab aankh hi se na tapaka to phir lahu kya hai
wo cheez jisake liye hamako ho bahisht aziz
sivae bada-e-gulfam-e-mushkabu kya hai
piyun sharab agar khum bhi dekh lun do char
ye shisha-o-qadah-o-kuza-o-subu kya hai
rahi na taqat-e-guftar aur agar ho bhi
to kis umeed pe kahiye ke aarzoo kya hai
bana hai shah ka musahib, phire hai itarata
vagarna shahar mein “ghalib” ke aabaru kya hai

 

Poet of the Poem / Ghazal or Nazam : Mirza Ghalib

 

Dab-daba aayi wo ankhen jo mera naam aaya – Taskeen Qureshi

Dab-daba aayi wo ankhen jo mera naam aaya
ishq nakam sahi phit bhi bahot kam aaya
lazzat-e-marg-e-mohabbat koi us se puche
jisake lab par dam-e-akhir bhi tera naam aaya
zindagi tere tasavvur se alag rah na saki
nagma koi ho magar saz yahi kam aaya
hum pe aisi bhi gam-e-ishq mein raten guzarin
jab tak aansu na bahe, dil ko na aaram aaya

 

Poet of the Poem / Ghazal or Nazam : Taskeen Qureshi

Aap ko dekh kar dekhata rah gaya – Aziz Qaisi

Aap ko dekh kar dekhata rah gaya
kya kahun aur kahane ko kya rah gaya
un ke aankhon mein kaise chalakane laga
mere honton pe jo majara rah gaya
aise bichde sabhi rah ke mod par
aakhari hamsafar rasta rah gaya
soch kar aao ku-e-tamanna hai ye
janeman jo yahan rah gaya rah gaya

 

Poet of the Poem / Ghazal or Nazam :Aziz Qaisi

Bhula do ranj ke baton mein kya hai – Shan ul Haq Haqi

Bhula do ranj ke baton mein kya hai
idhar dekho meri aankhon mein kya hai
bahut tarik din hai phir bhi dekho
ujala chandani raton mein kya hai
nahi patin jise bedar nazaren
khudaya ye mere khvabon mein kya hai
ye kya dhundhe chale jati hai duniya
tamasha-sa gali-kuchon mein kya hai
hai vahashat-si ye har chehare pe kaisi
na jane saham-sa nazaron mein kya hai
ye ik haijan-sa dariya mein kyon hai
ye kuch saman-sa maujon mein kya hai
zara-sa bal hai ik zulfon ka us ke
vagarna zor zanjiron mein kya hai
hain khamyaze surur-e-arazu ke
nishat-o-gam kaho namon mein kya hai
tumhari der-amezi bhi dekhi
takalluf lakhanau valon mein kya hai

 

Poet of the Poem / Ghazal or Nazam : Shan ul Haq Haqi

Bhigi hui aankhon ka ye manzar na milega – Bashir Badr

Bhigi hui aankhon ka ye manzar na milega
ghar chod ke mat jao kaheen ghar na milega
phir yaad bahur aayegi zulfon ke ghani sham
jab dhup mein saya koi sar par na milega
aansu ko kabhi os ka qatara na samajhana
aisa tumhen chahat ka samundar na milega
is khwab ke mahaul mein be-khvab hain aankhen
bazar mein aisa koi zevar na milega
ye soch lo ab aakhiri saya hai muhabbat
is dar se uthoge to koi dar na milega

 

Poet of the Poem / Ghazal or Nazam : Bashir Badr

Aankhon mein jee mera hai idhar yar dekhana – Meer Taqi Meer

aankhon mein jee mera hai idhar yar dekhana
aashiq ka apne aakhari didar dekhana
kaisa chaman ke hum se asiron ko mana hai
chak-e-qafas se bag ke divar dekhana
aankhen churaio na tuk abr-e-bahar se
meri taraf bhi didah-e-khunbar dekhana
ae ham-safar na aable ko pahunche chashm-e-tar
laga hai mere paon mein aa khar dekhana
hona na char chashm dik uss zulm-paishah se
hoshiyar zinhar khabardar dekhana
sayyad dil hai dag-e-judai se rashk-e-bag
tujh ko bhi ho nasib ye gulazar dekhana
gar zamzama yahi hai koi din to ham-safir
is fasl hi mein hum ko giriftar dekhana
bul-bul hamare gul pe na gustakh kar nazar
ho jayega gale ka kaheen har dekhana
shayad hamari khak se kuch ho bhi ae nasim
girbal kar ke kucha-e-dildar dekhana
us khush-nigah ke ishq se parahez kijio ‘meer’
jata hai leke jee hi ye aazar dekhana

 
Poet of the Poem / Ghazal or Nazam : Meer Taqi Meer

Aankhen meri talavon se mal jaye to achcha – Ibrahim Zauq

aankhen meri talavon se mal jaye to achcha
hai hasrat-e-pa-bos nikal jaye to achcha

jo chashm ke be-nam hon, wo ho kor to bahatar
jo dil ke ho be-dag, wo jal jaye to achcha

furqat mein teri tar-e-nafas sine mein mere
kanta sa khatakata hai, nikal jaye to achcha

wo subah ko aaye to karun baten main do-pahar
aur chahun ke din thoda sa dhal jaye to achcha
dhal jaye jo din bhi to isi tarah karun sham
aur chahun ke gar aj se kal jaye to achcha
jab kal ho to phir wohi karun kal ke tarah se
gar aj ka din bhi yun hi tal jaye to achcha
al-qissa nahi chahata main, jaye wo yan se
dil usaka yahin garache bahal jaye to achcha

Poet of the Poem / Ghazal or Nazam : Ibrahim Zauq








More about Aankhein Shayari and Poetry in Urdu and Hindi


Aankhein Shayaris,Shayari on Eyes,Aankhein SMS Shairy,Aankhen Hindi SMS,Aankhe Shayari , Aankhain Shayari SMS,Eyes Poetry, Aankhein Shairy,Ankhoun Shayari,Aankh Shayari,Aankhein Shayari Messages,Anjaani Aankhein