Ye din bahar ke ab ke bhi ras na aa sake
ki gunche khil to sake khil ke muskura na sake
meri tabahi dil par to raham kha na saki
jo roshni mein rahe roshni ko pa na sake
na jane aah! ki un aansuon pe kya guzri
jo dil se aankh tak aaye mishgan tak aa na sake
rahen khulus-e-muhabbat ke hadasat jahan
mujhe to kya mere naqsh-e-qadam mita na sake
karenge mar ke baqa-e-davam kya hasil
jo zinda reh ke muqam-e-hayat pa na sake
naya zamana banane chale the divane
nai zamin, naya aasaman bana na sake

Poet of the Poem / Ghazal or Nazam : Josh Malihabadi

Wo thaka hua meri bahon mein zara so gaya tha to kya hua
abhi main ne dekha hai chand bhi kisi shakh-e-gul pe jhuka hua
jise le gai hai abhi hawa wo varaq tha dil ke kitab ka
kaheen aansuon se mita hua kaheen aansuon se likha hua
kai mil ret ko kat kar koi mauj phul khila gai
koi ped pyas se mar raha hai nadi ke pas khada hua
mujhe hadason se saja saja ke bahut hasin bana diya
mera dil bhi jaise dulhan ka hath ho mehandiyon se racha hua
wohi khat ke jis pe jagah jagah do mahakate honton ke chand the
kisi bhule-bisare se taq par tah-e-gard hoga daba hua
vahii shahar hai wohi raste wohi ghar hai aur wohi lan bhi
magar us dariche se puchana wo darakht anar ka kya hua
mere sath jugnu hai hamsafar magar is sharar ke bisat kya
ye charag koi charag hai na jala hua na bujha hua

Poet of the Poem / Ghazal or Nazam : Bashir Badr

Siyahiyon ke bane harf harf dhote hain
ye log raat mein kagaz kahan bhigote hain
kisi ke shah mein dahaliz par diya na rakho
kivad sukhi hui lakadiyon ke hote hain
charag pani mein maujon se puchate honge
wo kon log hain jo kashtiyan dubote hain
qadim qasbon mein kya sukun hota hai
thake thakaye hamare buzurg sote hain
chamakati hai kaheen sadiyon mein aansuon ke zamin
gazal ke sher kahan roz roz hote hain

Poet of the Poem / Ghazal or Nazam : Bashir Badr

Sirf ashk-o-tabassum mein ulajhe rahe
hum ne dekha nahi zindagi ke taraf
raat dhalate jab unaka khayal aa gaya
tik-tiki bandh gai chandani ke taraf
kon sa jurm hai,kya sitam ho gaya
aankh agar uth gai, aap hi ke taraf
jane wo multafit hon kidhar bazm mein
aansuon ke taraf ya hansi ke taraf

Poet of the Poem / Ghazal or Nazam : Ehsaan Danish

Taskin-e-dil-e-mahazu na hui wo sai-e-qaram farama bhi gaye
us sai-e-qaram ka kya kahiye bahala bhi gaye tadapa bhi gaye
ek arz-e-vafa bhi kar na sake kuch kah na sake kuch sun na sake
yahan hum ne zaban hi khole thi vahan aankh jhuki sharama bhi gaye
aashuftagi-e-vahashat ke qasam hairat ke qasam hasrat ke qasam
ab aap kahe kuch ya na kahe hum raz-e-tabassum pa bhi gaye
rudad-e-gam-e-ulfat un se hum kya kahate kyonkar kahate
ek harf na nikala hothon se aur aankh mein aansu aa bhi gaye
arbab-e-junun pe furkat mein ab kya kahiye kya kya guzra
aaye the savad-e-ulfat mein kuch kho bhi gaye kuch pa bhi gaye
ye rang-e-bahar-e-alam hai kya fiqr hai tujh ko ae saqi
mahafil to teri suni na hui kuch uth bhi gaye kuch aa bhi gaye
is mahafil-e-kaif-o-masti mein is anjuman-e-irafani mein
sab jam-ba-kaf baithe rahe hum pi bhi gaye chhalaka bhi gaye

Poet of the Poem / Ghazal or Nazam : Majaz Lucknawi

Lahu na ho to kalam tarajuman nahi hota
hamare daur mein aansu zuban nahi hota
jahan rahega waheen roshni lutayega
kisi charag ka apna makan nahi hota
ye kis maqam pe lai hai meri tanahai
ke mujh se aj koi badguman nahi hota
main us ko bhool gaya hun ye kon manega
kisi charag ke bas mein dhuan nahi hota
‘wasim’ sadiyon ke aankhon se dekhiye mujh ko
wo lafz hun jo kabhi dastan nahi hota

Poet of the Poem / Ghazal or Nazam : Wasim Barelvi

Itna to zindagi mein kisi ke khalal pade
hansane se ho sukun na rone se kal pade
jis tarah hans raha hun main pi-pi ke ashk-e-gam
yun dusara hanse to kaleja nikal pade
ek tum ke tum ko fikr-e-nasheb-o-faraz hai
ek hum ke chal pade to baharahal chal pade
muddat ke bad us ne jo ke lutf ke nigah
jee khush to ho gaya magar aansu nikal pade
saqi sabhi ko hai gam-e-tashnalabi magar
may hai usi ke naam pe jis ke ubal pade

Poet of the Poem / Ghazal or Nazam : Kaifi Azmi

jahan main jaun hawa ka yahi ishara ho
koi nahi jo yahan muntazir tumhara ho
meri bujhati hui aankhon ko roshni bakhshe
wo phul jo tere chehare ka ista’ara ho
chala hun apni hi aavaz-e-bazgasht pe yun
kisi ne dur se jaise mujhe pukara ho
ganva chuke kai umren ummidvar tere
kahan tak aur teri berukhi gavara ho
tu pas aate huye mujh se dur ho jaye
ajab nahi ki yahi hadasa dobara ho
nazar farebi-e-rang-e-chaman se bach ‘makhmoor’
jise tu phul samajh le kaheen sharara ho

Poet of the Poem / Ghazal or Nazam :Makhmoor Saeedi