Shaikh jee thodi si pikar aaiye
may hai kya shay phir hamen batalaiye
aap kyon hain sari duniya se khafa
aap bhi dushman mere ban jaiye
kya hai acha kya bura banda-navaz
aap samajhen to hamen samajhaiye
jane dije aql ke baten janab
dil ke suniye aur pite jaiye

Poet of the Poem / Ghazal or Nazam : Sudarshan Faakir

Tohamaten chand apne zimme dhar chale
jis liye aaye the so hum kar chale
zindagi hai ya koi tufan hai
hum to is jine ke hathon mar chale
kya hamen kam is gulon se ae saba
ek dam aaye idhar udhar chale
dosto dekha tamasha yan ka sab
tum raho khush hum to apne ghar chale
aah bas jee mat jala tab janiye
jab koi afsun tera us par chale
shama ke manind hum is bazm mein
chashm-nam aaye the daman-tar chale
dhundhate hain aap se usako pare
shekh sahib chod ghar bahar chale
hum jahan mein aaye the tanhavale
sath apne ab use lekar chale
jun sharar ae hasti-e-bebud yan
bare hum bhi apni bari bhar chale
ek main dil resh hun vaisa hi dost
zakhm kitanon ka suna hai bhar chale
hum na jane paye bahar aap se
wo bhi aade aa gaya jidhar chale
saqiya yan lag raha hai chal chalao
jab talak bas chal sake sagar chale
“dard” kuch malum hai ye log sab
kis taraf se aaye the kidhar chale

Poet of the Poem / Ghazal or Nazam : Khwaja Mir Dard

Todana tute huye dil ka bura hota hai
jis ka koi nahi us ka to khuda hota hai
mang kar tum se khushi lun mujhe manzur nahi
kis ka mangi hui daulat sebhala hota hai
log nahak kisi majabur ko kahate hain bura
aadmi ache hain par waqt bura hota hai
kyon “munir” apni tabahi ka ye kaisa shikwa
jitana taqadir mein likha hai ada hota hai

Poet of the Poem / Ghazal or Nazam : Munir Niazi

Tod kar uthe hain jam-o-shisha-o-paimana hum
kis se kah den aj raz-e-gardish-e-mastana hum
bijaliyan ruposh tufan dam bakhud sahara khamosh
ja rahe hain kis taraf ae lagzish-e-mastana hum
zindagi ik mustaqil sharah-e-tamanna thi magar
umr bhar teri tamanna se rahe begana hum
tujh mein bhi kuch hosh-mandana adayen aa gain
tujh se bhi ab badaguman hain ae dil-e-divana hum
khushk aankhen dil shikasta ruh tanha lab khamosh
bastiyon se dekhte hain surat-e-virana hum
hum tak ab aaye na aaye daur-e-paimana “ravish”
mutamain baithe hain zer-e-saya-e-maikhana hum

Poet of the Poem / Ghazal or Nazam : Ravish Siddiqui

Shayad abhi hai rakh mein koi sharar bhi
kyon warna intazar bhi hai iztirar bhi
dhyan aa gaya hai marg-e-dil-e-namurad ka
milane ko mil gaya hai sukun bhi qarar bhi
ab dhundhane chale ho musafir ko dosto
hadd-e-nigah tak na raha jab gubar bhi
har aastan pe nasiyafarsa hain aj wo
jo kal na kar sake the tera intazar bhi
[ik reh ruk gai to thithak kyon gai ‘ada’
aabad bastiyan hain pahadon ke par bhi

Poet of the Poem / Ghazal or Nazam : Ada Jafri

Thandi hawa ke jhonke chalte hain halake halake
aise mein dil na todo wade karo na kal ke
chalte hain ye bhi hum se tevar badal badal ke
jin ko sikhaya hum ne chalana sambhal sambhal ke
saqi ne aj mujh ko aisi nazar se dekha
mausam hua gulabi rangin jam chalake
bistar ke silvaton se ye mahasus ho raha hai
toda hai dam kisi ne karavat badal badal ke

Poet of the Poem / Ghazal or Nazam : Poet Unknown

Sham ke sanvale chehare ko nikhara jaye
kyon na sagar se koi chand ubhara jaye
ras aaya nahi taskin ka sahil koi
phir mujhe pyas ke dariya mein utara jaye
meharaban teri nazar, teri adayen qatil
tujh ko kis naam se ae dost pukara jaye
mujhko dar hai tere wade pe bharosa karake
muft mein ye dil-e-khushafaham na mara jaye
jisake dam se tere din-rat darakhshan the “qateel”
kaise ab us ke bina waqt guzra jaye

Poet of the Poem / Ghazal or Nazam : Qateel Shifai

Sham ho jam ho subu bhi ho
tujh ko pane ke justaju bhi ho
dil se dil ke kahaniyan bhi sune
aankhon aankhon mein guftagu bhi ho
jhil si gahari sabz aankhon mein
dub jane ke aarzoo bhi ho
sirf tere badan ke shama jale
aur andhera-sa charsu bhi ho

Poet of the Poem / Ghazal or Nazam : Zameer Kazmi