pas-e-adab mein josh-e-tamanna liye hue
main bhi hun ek hubab mein dariya liye hue
rag-rag mein aur kuch na raha juz khayal-e-dost
us shokh ko hun aj sarapa liye hue
saramaya-e-hayat hai hirmane-e-ashiqi
hai sath ek surat-e-zeba liye hue
josh-e-junun mein chut gaya aastan-e-yar
rote hain muh mein daman-e-sahara liye hue
‘asghar’ hujum-e-dard-e-garibi mein usaki yaad
aai hai ik tilismi tamanna liye hue
Poet of the poem / Ghazal or Nazam :Asghar Gondvi
paon ke zakhm hain farsh-e-gul-e-tar hone tak
reh dushvar hai aagaz-e-safar hone tak
ye alag baat ke khamosh hain ahal-e-zindan
warna ye qaid hai divar mein dar hone tak
ek nazar naqsh-e-kaf-e-pa ka hunar to dekho
kahkashan si nazar aati hai sahar hone tak
haye wo bij jo matti mein daba rehta hai
kin marahil se guzarata hai shajar hone tak
kya khabar tum ko ki ye saqf ye divar hain kya
hum pe kya guzri hai is chaon ke ghar hone tak
Poet of the poem / Ghazal or Nazam :Himayat Ali Shayar
pa-ba-gil sab hain rihai ke kare tadabir kon
dast-basta shahar mein khole meri zanjir kon
mera sar hazir hai lekin mera munsif dekh le
kar raha hai mere fard-e-jurm ko taharir kon
meri chadar to chini thi sham ke tanhai ne
beridai ko meri phir de gaya tashahir kon
neend jab khwabon se pyari ho to aise ahad mein
khwab dekhe kon aur khwabon ko de tabir kon
ret abhi pichale makanon ke na vapas aayi thi
phir lab-e-sahil gharaunda kar gaya tamir kon
sare rishte hijraton mein sath dete hain to phir
shahar se jate hue hota hai damangir kon
dushmanon ke sath mere dost bhi aazad hain
dekhana hai khenchata hai mujh pe pahala tir kon
Poet of the poem / Ghazal or Nazam 
arveen Shakir
meri zuban se meri dastan suno to sahi
yaqin karo na karo meherban suno to sahi
chalo ye man liya mujrim-e-mohabbat hain
hamare jurm ka hum se bayan suno to sahi
banoge dost mere tum bhi dushmanon ek din
meri hayat ke aah-o-fugan suno to sahi
labon ko si ke jo baithe hain bazm-e-duniya mein
kabhi to unaki bhi khamoshiyan suno to sahi
kahoge waqt ko mujarim bhari baharon mein
jala tha kaise mera aashiyan suno to sahi
Poet of the Poem / Ghazal or Nazam :Sudarshan Faakir
mere hi lahu par guzar auqat karo ho
mujh se hi amiron ke tarah baat karo ho
din ek sitam ek sitam raat karo ho
wo dost ho dushman ko bii mat karo ho
hum khaqnashin tum sukhanaray sar-e-bam
pas aakar milo dur se kya baat karo ho
hum ko jo mila hai wo tumhin se to mila hai
hum aur bhula den tumhen kya baat karo ho
yun to muh pher ke dekho bhi nahi ho
jab waqt pade hai to madarat karo ho
na daman pe koi chint na khanjar pe koi daag
tum qatl karo ho ke karamat karo ho
bakane do “ajiz” ko jo bole hai bake hai
divana hai divane se kya baat karo ho
Poet of the Poem / Ghazal or Nazam : Kaleem Ajiz
mere ham-nafas, mere ham-nava, mujhe dost banake daga na de
main hun dard-e-ishq se janvalab, mujhe zindagi ke dua na de
mere dag-e-dil se hai raushani, usi roshni se hai zindagi
mujhe dar hai aye mere charagar, ye charag tu hi bujha na de
mujhe chod de mere hal par, tera kya bharosa hai charagar
ye teri nawazish-e-mukhtasar, mera dard aur bada na de
mera azm itna baland hai ke paraye sholon ka dar nahi
mujhe khauf aatish-e-gul se hai, ye kaheen chaman ko jala na de
wo uthe hain leke hom-o-subu, arey o ‘shakeel’ kahan hai tu
tera jam lene ko bazm mein koi aur hath bada na de
Poet of the Poem / Ghazal or Nazam : Shakeel Badayuni
mere dukh ke koi dawa na karo
mujh ko mujh se abhi juda na karo
nakhuda ko khuda kaha hai to phir
dub jao, khuda khuda na karo
ye sikhaya hai dosti ne hamen
dost banakar kabhi wafa na karo
ishq hai ishq, ye mazak nahi
chand lamhon mein faisala na karo
ashiqi ho ya bandagi ‘fakir’
be-dilli se to ibatida na karo
Poet of the Poem / Ghazal or Nazam :Sudarshan Faakir
may pilakar aapaka kya jayega
jayega iman jisaka jayega
dekhakar mujhko wo sharma jayega
ye tamasha kisase dekha jayega
jaun butakhane se q kabe ko main
hath se ye bhi thikana jayega
qatl ke jab usane di dhamaki mujhe
kah diya main ne bhi dekha jayega
pi bhi le do ghunt zahid pi bhi le
maikade se kon pyasa jayega
Poet of the Poem / Ghazal or Nazam :Bekhud Dehlvi
