maujon ka aks hai khat-e-jam-e-sharab mein
ya khoon uchal raha hai rag-e-mahatab mein
wo maut hai ki kahate hain jisako sukun sab
wo ain zindagi hai jo hai iztarab mein
dozakh bhi ek jalva-e-firdaus se husn hai
jo is se bekhabar hain wohi hain azab mein
us din bhi meri ruh thi mahv-e-nishat-e-did
musa ulajh gae the saval-o-javab mein
main iztarab-e-shauq kahun ya jamal-e-dost
ik barq hai jo kaundh rahi hai naqab mein

Poet of the Poem / Ghazal or Nazam :Asghar Gondvi

manzil-e-janan ko jab ye dil ravan tha dosto
tum ko main kaise bataun kya saman tha dosto
har guman pahane hue tha ek malbus-e-yaqin
har yaqin jan dada-e-husn-e-guman tha dosto
dil ki har dhadakan makan-o-lamakan par thi muhit
har nafas raz-e-doalam ka nishan tha dosto
kya khabar kis justaju mein is qadar aawara tha
dil ke jo ganjina-e-sarr-e-nihan tha dosto
dhundhane par bhi na milta tha mujhe apna vujud
main talash-e-dost mein yun benishan tha dosto
markad-e-iqbal par hazir thi jab dil ki tadap
zindagi ka ek parda darmiyan tha dosto
qarb ne paida kiya tha khud hi duri ka saman
fasala warna hail kahan tha dosto
bekhudi mein jab mere honton ne chuma qabr ko
mere sina se gada-e-fursiyan tha dosto
ru-ba-ru-e-jalva-e-markad vujud-e-kam ayar
zar-e-naqis sharmasar-e-imtehan tha dosto
partav-e-dil mein nihan thi tah-bateh ye khamoshi
ishq ka wo bhi ik izhar-e-bayan tha dosto
jalvagah-e-dost ka aalam kahun main tum se kya
jalva hi jalva vahan tha main kahan tha dosto
sajdagah-e-khurshiyan tha yan na jane kya tha wo
jo meri nazron ke aage aastan tha dosto
dil ne har lamhe ko dekha ik nirale rang mein
lamha lamha dastan dar dastan tha dosto
jis ke sher-o-nagmagi par vusat-e-alam thi tang
har subah ko wo dopahre bekaran tha dosto
so raha tha khak ke niche jahan-e-zindagi
raz-e-hasti meri nazron par ayan tha dosto
kash tum bhi meri palkon ka nazara dekhte
ye nazara kahkashan dar kahkashan tha dosto

Poet of the Poem / Ghazal or Nazam :Jagannath Azad

main na hindu na musalaman mujhe jine do
dosti hai mera iman mujhe jine do
koi ehsaan na karo mujh pe to ahasan hoga
sirf itna karo ehsaan mujhe jine do
sab ke dukh dard ko apna samajh kar jina
bas yahi hai mera araman mujhe jine do
log hote hain jo hairan mere jine se
log hote rahen hairan mujhe jine do

Poet of the Poem / Ghazal or Nazam :Shahid Kabir

mana ke un ke nezon pe ab sar nahi koi
kya un ke aastin mein bhi khanjar nahi koi
majaburiyon ne ghar se nikalne na diya
duniya samajh rahi hai mera ghar nahi koi
ab kya karenge hum naye surajki roshani
jab dekhane ke vaste manzar nahi koi
dil ho raha hai der se khamosh jhil sa
kya doston ke hath mein pathar nahi koi
qismat sabhi ke waqt ke hathon mein rahati hai
is daur mein kisi ka muqaddar nahi koi

Poet of the Poem / Ghazal or Nazam :Sagar Azmi

juz tere koi bhi din raat na jane mere
tu kahan hai magar ae dost purane mere

tu bhi khushbu hai magar mera tajassus bekar
barq-e-avara ke manind thikhane mere
shama ki lau thi ke wo tu tha magar hijr ke raat
der tak rota raha koi sirhane mere

khalq ke bekhabari hai ke meri rusavai
log mujh ko hi sunate hain fasane mere
lut ke bhi khush hun ke ashkon se bhara hai daman
dekh garatgare dil ye bhi khazane mere
aj ik aur baras bit gaya us ke bagair
jis ke hote hue hote the zamane mere
kash tu bhi meri aavaz sunata ho
phir pukare hai tujhe dil ke sada ne mere
kash tu bhi kabhi aajaye masihai ko
log aate hain bahut dil ko dukhane mere
kash auron ke tarah main bhi kah sakata
baat sun li hai meri aj khuda ne mere
tu hai kis hal mein ae zudfaramosh mere
mujh ko to chin liya ahad-e-vafa ne mere
charagar yun to bahut hain magar ae jan-e-’faraz’
juz tere aur koi gham na jane mere

Poet of the Poem / Ghazal or Nazam :Ahmed Faraz

jine wale qaza se darate hain
zeher pikar dawa se darate hain
zahidon ko kisi ka khauf nahi
sirf kali ghata se darate hain
aah jo kuch kahe hamen manzur
nek bande khuda se darate hain
dushmanon ke sitam ka khuaf nahi
doston ke wafa se darate hain
azm-o-himmat ke bavajud “shakeel”
ishq ke ibtada se darate hain

Poet of the Poem / Ghazal or Nazam :Shakeel Badayuni

jab se hum tabah ho gaye
tum jahanpanah ho gaye
husn par nikhar aa gaya
aaine siyah ho gaye
aandhiyon ko kuch pata nahi
hum bhi gard-e-rah ho gaye
dushmanon ko chitthiyan likkho
dost khair-khvah ho gaye

Poet of the Poem / Ghazal or Nazam :Bekal Utsahi

hoti hai tere naam se vahshat kabhi kabhi
barham hui hai yun bhi tabiyat kabhi kabhi
ae dil kise nasib ye taufiq-e-iztirab
milati hai zindagi mein ye rahat kabhi kabhi
tere karam se ae alam-e-husn-e-afrin
dil ban gaya hai dost ke khilvat kabhi kabhi
dil ko kahan nasib ye taufiq-e-iztirab
milati hai zindagi mein ye rahat kabhi kabhi
josh-e-junun mein dard ke tugayaniyon ke sath
ashkon mein dhal gai teri surat kabhi kabhi
tere qarib rah ke bhi dil mutamain na tha
guzri hai mujh pe bhi ye qayamat kabhi kabhi
kuch apana hosh tha na tumhara khayal tha
yun bhi guzar gai shab-e-furqat kabhi kabhi
ae dost hum ne tark-e-muhabbat ke bavajud
mahasus ke hai teri zarurat kabhi kabhi

 
Poet of the Poem / Ghazal or Nazam : Nasir Kazmi