Category: Dosti Shayari

Hoti hai tere naam se vahshat kabhi kabhi – Nasir Kazmi

hoti hai tere naam se vahshat kabhi kabhi
barham hui hai yun bhi tabiyat kabhi kabhi
ae dil kise nasib ye taufiq-e-iztirab
milati hai zindagi mein ye rahat kabhi kabhi
tere karam se ae alam-e-husn-e-afrin
dil ban gaya hai dost ke khilvat kabhi kabhi
dil ko kahan nasib ye taufiq-e-iztirab
milati hai zindagi mein ye rahat kabhi kabhi
josh-e-junun mein dard ke tugayaniyon ke sath
ashkon mein dhal gai teri surat kabhi kabhi
tere qarib rah ke bhi dil mutamain na tha
guzri hai mujh pe bhi ye qayamat kabhi kabhi
kuch apana hosh tha na tumhara khayal tha
yun bhi guzar gai shab-e-furqat kabhi kabhi
ae dost hum ne tark-e-muhabbat ke bavajud
mahasus ke hai teri zarurat kabhi kabhi

 

 
Poet of the Poem / Ghazal or Nazam : Nasir Kazmi

Har qadam par nit naye sanche mein dhal jate hain log – Himayat Ali Shayar

har qadam par nit naye sanche mein dhal jate hain log
dekhte hi dekhte kitne badal jate hain log
kis liye kije kisi gumgashta jannat ke talash
jab ki matti ke khilone se bahal jate hain log

kitne sada dil hain ab bhi sun ke aavaz-e-jaras
pesh-o-pas se bekhabar ghar se nikal jate hain log

shama ke manind ahal-e-anjuman se beniyaz
aksar apni aag mein chup-chap jal jate hain log
‘shayar’ un ke dosti ka ab bhi dam bharate hain aap
thokaren kha kar to sunate hain sambhal jate hain log
 

Poet of the Poem / Ghazal or Nazam : Himayat Ali Shayar

Hum ko kisake gham ne mara ye kahani phir sahi – Masroor Anwar

hum ko kisake gham ne mara ye kahani phir sahi
kis ne toda dil hamara ye kahani phir sahi
dil ke lutane ka sabab pucho na sab ke samane
naam aayega tumhara ye kahani phir sahi
nafaraton ke tir kha kar doston ke shahar mein
hum ne kis kis ko pukara ye kahani phir sahi
kya batayen pyar ke bazi wafa ke rah mein
kon jeeta kon hara ye kahani phir sahi

 

Poet of the Poem / Ghazal or Nazam : Masroor Anwar

Hum dosti ehasaan wafa bhool gaye hain – Payam Saeedi

hum dosti ehasaan wafa bhool gaye hain
zinda to hain jine ke ada bhool gaye hain
khushbu jo lutate hain masalate hain usi ko
ehasas ka badala ye milta hai kali ko
ehasas to lete hain sila bhool gaye hain
karte hain muhabbat ka aur ehasas ka sauda
matalab ke liye karte hain iman ka sauda
dar maut ka aur khauf-e-khuda bhool gaye hain
ab mom mein dhalakar koi pathar nahi hota
ab koi bhi qurban kisi par nahi hota
q bhatake hain manzil ka pata bhool gaye hain

Poet of the Poem / Ghazal or Nazam :Payam Saeedi

Hadase kya kya tumhari berukhi se ho gaye – Sagar Nizami

hadase kya kya tumhari berukhi se ho gaye
sari duniya ki liye hum ajanabi se ho gaye
gardish-e-dauran, zamane ki nazar, aankhon ki neend
kitne dushman ek rasm-e-dosti se ho gaye
kuch tumhari gesuon ki barahami ne kar diya
kuch andhere mere ghar mein roshni se ho gaye
yun to hum aagah the saiyad ki tadbir se
hum asir-e-dam-e-gul apni khudi se ho gaye

har qadam “sagar” nazar aane lagi hain manzilen
marhale tay meri kuch aavaragi se ho gaye

 
Poet of the Poem / Ghazal or Nazam :Sagar Nizami

aamad-e-khat se hua hai sard jo bazar-e-dost – Mirza Ghalib

aamad-e-khat se hua hai sard jo bazar-e-dost
dud-e-shama-e-kushta tha shayad khat-e-rukhsar-e-dost

ae dil na’aqabat andesh zabt-e-shauq kar
kon la sakata hai tab-e-jalva-e-didar-e-dost

khana viransazi-e-hairat tamasha kijiye
surat-e-naqsh-e-qadam hun rafta-e-raftar-e-dost

ishq mein bedad-e-rashq-e-gair ne mara mujhe
kushta-e-dushman hun aakhir garche tha bimar-e-dost

 
Poet of the Poem / Ghazal or Nazam : Mirza Ghalib

Aali jee ab aap chalo tum apne bojh uthaye – Jameeluddin Aali

aali jee ab aap chalo tum apne bojh uthaye
sath bhi de to aakhir hamare koi kahan tak jaye

jis suraj ke aas lagi hai shayad wo bhi aaye
tum ye kaho khud tum ne ab tak kitane diye jalaye

apana kam hai sirf mohabbat baqi us ka kam
jab chahe wo ruthe hum se jab chahe man jaye

kya kya rog lage hain dil ko kya kya un ke bhed
hum sab ko samajhane wale kon hamen samajhaye

ek isi ummid pe hain sab dushman dost qabul
kya jane is sada-ravi mein kon kahan mil jaye

duniya wale sab sache par jina hai us ko bhi
ek garib akela papi kis kis se sharmaye

itna bhi majabur na karana varna hum kah denge
o “ali” pe hansane wale tu “ali” ban jaye

Poet of the Poem / Ghazal or Nazam : Jameeluddin Aali

aag puri kahan bujhi hai abhi – Midahtul Akhtar

aag puri kahan bujhi hai abhi
dida-e-tar mein tishnagi hai abhi

doston se chuka raha hun hisab
dushmanon se kahan thani hai abhi

dost kah kar mujhe na de gali
dil pe ik zakhm-e-dosti hai abhi

kat de ye bhi khudparasti mein
aur thodi si zindagi hai abhi

jane kyon kund ho gaya nashtar
zakhm ke dhar to vahi hai abhi

Poet of the Poem / Ghazal or Nazam : Midahtul Akhtar








More about Dosti Shayari and Poetry in Urdu and Hindi


Dosti Shayari,Dosti SMS in Hindi,Friendship Day Shayari,Dosti Hindi Shayri,Dosti,Urdu Dosti Shayari,New Dosti Shayari,Shayaris on Dosti,Yaari Shayari,Yaar SMS,Hindi Shayari Friendship