Rudad-e-muhabbat kya kahiye kuch yaad rahi kuch bhool gaye
do din ke masarrat kya kahiye kuch yaad rahi kuch bhool gaye

jab jam diya tha saqi ne jab daur chala tha mahafil mein
wo hosh ke sa’at kya kahiye kuch yaad rahi kuch bhool gaye

ehasas ke maikhane mein kahan ab fikr-o-nazar ke qandilen
aalam ke shiddat kya kahiye kuch yaad rahi kuch bhool gaye

ab apni haqiqat bhi “sagar” berabt kahani lagti hai
duniya ke haqiqat kya kahiye kuch yaad rahi kuch bhool gaye

Poet of the Poem / Ghazal or Nazam :Sagar Siddiqui

Tera chehara kitna suhana lagata hai
tere aage chand purana lagata hai
tirache tirache tir nazar ke lagate hain
sidha sidha dil pe nishana lagata hai
aag ka kya hai pal do pal mein lagti hai
bujhate bujhate ek zamana lagata hai
sach to ye hai phul ka dil bhi chalani hai
hansata chehara ek bahana lagata hai

Poet of the Poem / Ghazal or Nazam : Kaif Bhopali

Taskin ko hum na roen jo zauq-e-nazar mile
huran-e-khuld mein teri surat magar mile
apni gali mein mujh ko na kar dafn bad-e-qatl
mere pate se khalq ko kyon tera ghar mile
saqi gari ke sharm karo aj warna hum
har shab piya hi karte hain mein jis qadar mile
tujh se to kuch kalam nahin lekin ae nadim
mera salam kahiyo agar namabar mile
tum ko bhi hum dikhaye ke majanun ne kya kiya
fursat kashakash-e-gam-e-pinhan se gar mile
lazim nahi ke khijr ke hum pairavi karen
mana ke ek buzurg hamen hum safar mile
ae sakanan-e-kucha-e-dildar dekhana
tum ko kaheen jo ghalib-e-ashufta sar mile

Poet of the Poem / Ghazal or Nazam : Mirza Ghalib

Takra hi gai meri nazar un ke nazar se
dhona hi pada hath mujhe qalb-o-jigar se
izhar-e-mohabbat na kiya bas isi dar se
aisa na ho gir ja un kaheen un ke nazar se
ae zauq-e-talab josh-e-junun ye to bata de
jana hai kahan aur hum aaye hain kidhar se
‘fayyaz’ ab aaya hai junun josh pe apna
hansata hai zamana main guzarata hun jidhar se

Poet of the Poem /  Ghazal or Nazam: Faiyaz Hashmi

uthi hai magrib se ghata
pine ka mausam aa gaya
hai raqs mein ik mah-laqa
nazuk ada naz aafrin
han nachati ja gaye ja
nazron se dil baramaye ja
tadapaye ja tadapaye ja
o dushman-e-duniya-o-din
tera thirakana khub hai
teri adayen dil-nashin
lekin thahar tu kon hai
o nim-uriyan nazanin
kya mashriqi aurat hai tu
hargiz nahi hargiz nahi
teri hansi bebak hai
teri nigah chalak hai
uff kis qadar dil-soz hai
taqarir bazari teri
kitni havas aamez hai
ye sada purkari teri
sharm aur izzat valiyan
hoti hain iffat valiyan
wo husn ke shahzadiyan
parde ke hain aabadiyan
chashm-e-falak ne aj tak
dekhi nahi un ke jhalak
sarmaya-e-sharm-o-haya
zevar hai un ke husn ka
shohar ke dukh sahati hain wo
muh se nahi kahati hain wo
kab samane aati hain wo
gairat se kat jati hain wo
aziyat-e-millat un se hai
nam-e-sharafat un se hai
imam par qayam hain wo
pakiza-o-sayam hain wo
tujh mein nahi sharm-o-haya
tujh mein nahi mahar-o-vafa
sach sach bata tu kon hai
o behaya tu kon hai
ye pur-fasun gamze tere
na-maharamon ke samane
hat samane se dur ho
maradud ho maqhur ho
taqadir ke heti hai tu
shaitan ke beti hai tu
jis qaum ke aurat hai tu
us qaum par lanat hai tu
lekin thahar jana zara
teri nahi koi khata
mardon mein gairat hi nahi
qaumi hamiyat hi nahim
wo millat-e-baiza ke thi
sare jahan ke roshni
jamiyat-e-islamiyan
shahanshah-e-hindustan
ab is mein dam kuch bhi nahi
hum kya hain hum kuch bhi nahi
milli siasat uth gai
bazu ke taqat uth gai
shan-e-hejazi ab kahan
wo turk-tazi ab kahan
ab gazanavi himmat gai
ab babari shaukat gai
lekin mujhe kya khabt hai
taqarir kyon berabt hai
itna sharabi ho gaya
aql-o-khirad bhi kho gaya
mujhko zamane se garaz
mitane mitane se garaz
hindustan se kam kya
andesha-e-islam kya
jine do jine do mujhe
pine do pine do mujhe
jab hashr ka din aayega
us waqt dekha jayega
han nachati ja gaye ja
nazron se dil baramaye ja
tadapaye ja tadapaye ja
dushman-e-duniya-o-din

        Poet of The Poem / Ghazal or Nazam :Hafeez Jullundhri

Saqiya ik nazar jam se pahale pahale
hum ko jana hai kaheen sham se pahale pahale
khush hua ae dil ke muhabbat to nibha di tune
log ujad jate hain anjam se pahale pahale
ab tere zikr pe hum baat badal dete hain
kitni ragabat thi tere naam se pahale pahale
samane umr padi hai shab-e-tanhai ke
wo mujhe chod gaya sham se pahale pahale

Poet of the Poem / Ghazal or Nazam :Ahmed Faraz

rahi nagufta mere dil mein dastan meri
na is dayar mein samajha koi zaban meri
barang-e-saut-e-jaras tujh se dur hun tanaha
khabar nahi hai tujhe aah karavan meri
usi se dur raha asl-e-mudda jo tha
gai ye umr-e-aziz aah rayagan meri
tere firaq mein jaise khayal muflis ka
gai hai fikr-e-pareshan kahan kahan meri
diya dikhai mujhe to usi ka jalva “meer”
padi jahan mein ja kar nazar jahan meri

Poet of The Poem / Ghazal or Nazam :Meer Taqi Meer

rah-e-ashiqi ke mare rah-e-am tak na pahunche
kabhi subah tak na pahunche kabhi sham tak na pahunche

mujhe mast agar bana de ye nigah-e-mast teri
mera hath kya nazar bhi kabhi jam tak na pahunche

mujhe apni bekasi ka nahi gham khayal ye hai
kaheen baat badhate badhate tere naam tak na pahunche

jo ye daur bevafa hai tera gham to mustaqil ho
wo hayat-e-ashiqi kya jo davam tak na pahunche

ye anokhi barhami hai ke na bhule se labon par
basabil-e-tazaqira bhi mere naam tak na pahunche

kaheen is tarah bhi ruthe na kisi se koi ‘yahya’
ke payam tak na aaye ke salam tak na pahunche

Poet of The Poem / Ghazal or Nazam :Yahya Jasdanwalla