mujhe bhulanevale tujhe bhi chain na aaye
tu bhi jage tu bhi tadape tu bhi nir bahaye
badal garaje bijli chamake tadap tadap reh jaye
patajhad aaye chae udasi man mein aag lagaye
tu bhi inako yaad kare aur tham ke dil reh jaye
aramanon ka mahal banake aap hi tune tod diya
ek suhana geet sunaya
meri ninden chin li tune aise khwab dikhaye
jab bhi savan lekar aaye pyar bhari barasaton ko
yaad kare tu baithakar tanha sath guzri raton ko
meri tarah tere man mein bhi barakha aag lagaye

Poet of the Poem / Ghazal or Nazam :Sehba Akhtar

mujhe de rahen hain tasalliyan wo har ek taza payam se
kabhi aake manzar-e-am par kabhi hat ke manzar-e-am se
na garaz kisi se na vasta, mujhe kam apne hi kam se
tere zikr se, teri fikr se, teri yaad se, tere naam se
mere saqiya, mere saqiya, tujhe marahaba, tujhe marahaba
tu pilaye ja, tu pilaye ja, isi chashm-e-jam ba jam se
teri subh-o-aish hai kya bala, tujhe ae falak jo ho hausla
kabhi karale aake muqabila, gam-e-hijr-e-yar ke sham se

Poet of the Poem / Ghazal or Nazam :Jigar Moradabadi

mujh ko shikast-e-dil ka maza yaad aa gaya
tum kyon udas ho kya yaad aa gaya
kahane ko zindagi thi bahut mukhtasar magar
kuch yun basar hui ke khuda yaad aa gaya
waiz salam le ke chala maikade ko main
firdaus-e-gumshuda ka pata yaad aa gaya
barase bagair hi jo ghata ghir ke khul gai
ek bevafa ka ahd-e-vafa yaad aa gaya
mangenge ab dua ke use bhool jayen hum
lekin jo wo bevaqt-e-dua yaad aa gaya
hairat hai tum ko dekh ke masjid mein ae ‘khumar’
kya baat ho gai jo khuda yaad aa gaya

Poet of the Poem / Ghazal or Nazam : Khumar Barabankvi

mujh se mera kya rishta hai har ik rishta bhool gaya
itane aaine dekhe hain apna chehara bhool gaya
ab to ye bhi yaad nahi hai farq tha kitna donon mein
us ke baten yaad rahin aur us ka lahaja bhool gaya
pyasi dharti ke honton par mera naam nahi to kya
main wo badal ka tukada hun jis ko dariya bhool gaya
duniya wale kuch bhi kahen “rashid” apni majboori hai
us ke gali jab yaad aayi hai ghar ka rasta bhu gaya

Poet of the Poem / Ghazal or Nazam :Mumtaz Rashid

khwab ke tarah se hai yaad ke tum aaye the
jis tarah daman-e-mashriq mein sahar hoti hai
zarre zarre ko tajalli ke khabar hoti hai
aur jab nur ka sailab guzar jata hai
raat bhar ek andhere mein basar hoti hai
kuch isi tarah se hai yaad ke tum aaye the

jaise gulashan mein dabe paon bahar aati hai
patti patti ke liye leke nikhar aati hai
aur phir waqt wo aata hai ke har mauj-e-saba
apne daman mein liye gard-o-gubar aati hai
kuch isi tarah se hai yaad ke tum aaye the

jis tarah mahv-e-safar ho koi virane mein
aur raste mein kaheen koi khiyaban aa jaye
chand lamhon mein khiyaban ke guzar jane par
samane phir vohi duniya-e-biyaban aa jaye
kuch isi tarah se hai yaad ke tum aaye the

Poet of the Poem / Ghazal or Nazam :Jagannath Azad

Khoon se jab jala diya ek diya bujha hua
phir mujhe de diya gaya ek diya bujha hua
ek hi dastan-e-shab ek hi silsila to hai
ek diya jala hua ek diya bujha hua
mahafil-e-rang-o-nur ke phir mujhe yaad aa gai
phir mujhe yaad aa gaya ek diya bujha hua
mujh ko nishat se fuzun rasm-e-vafa aziz hai
mera rafiq-e-shab raha ek diya bujha hua
dard ke kainat mein mujh se bhi roshni rahi
vaise meri bisat kya ek diya bujha hua
sab meri raushani-e-jan harf-e-sukhan mein dhal gai
aur main jaise reh gaya ek diya bujha hua

Poet of the Poem / Ghazal or Nazam : Pirzada Qasim

Khuda wo waqt na laye ki sogawar ho tu
sukun ke neend tujhe bhi haram ho jaye
teri masarrat-e-paiham tamam ho jaye
teri hayat tujhe talkh jam ho jaye
gamon se aaina-e-dil gudaz ho tera
hujum-e-yas se betab hoke reh jaye
wafur-e-dard se simab ho ke reh jaye
tera shabab faqat khwab ho ke reh jaye
gurur-e-husn sarapa niyaz ho tera
tawil raton mein tu bhi qarar ko tarase
teri nigah kisi gamgusar ko tarase
khizanrasida tamanna bahar ko tarase
koi jabin na tere sang-e-astan pe jhuke
ki jins-e-ijz-o-aqidat se tujh ko shad kare
fareb-e-wada-e-farda pe aetamad kare
khuda wo waqt na laye ki tujh ko yaad aaye
wo dil ki tere liye be-qarar ab bhi hai
wo aankh jis ko tera intazar ab bhi hai

Poet of the Poem / Ghazal or Nazam : Faiz Ahmed Faiz

sitare jo damakate hain
kisi ke chashm-e-hairan mein
mulaqaten jo hoti hain
jamal-e-abr-o-baran mein
ye na abad vaqton mein
dil-e-nashad mein hogi
muhabbat ab nahi hogi
ye kuch din bad mein hogi
guzar jayenge jab ye din
ye un ke yaad mein hogi

Poet of the Poem / Ghazal or Nazam :Amjad Islam Amjad