Ye inayaten gazab ke ye bala ke meharabani
meri khairiyat bhi puchi kisi aur ke zubani
mera gham rula chuka hai tujhe bikhari zulf wale
ye ghata bata rahi hai ki baras chuka hai pani
tera husn so raha tha meri ched ne jagaya
wo nigah main ne dali ki sanvar gai javani
meri bezuban aankhon se gire hain chand qatre
wo samajh sake to aansu na samajh sake to pani

Poet of the Poem / Ghazal or Nazam : Nazeer Banarasi

Ye kon aa gai dilruba mahaki mahaki
fiza mahaki mahaki hawa mahaki mahaki
wo aankhon mein kajal wo balon mein gajara
hatheli pe usake hina mahaki mahaki
khuda jane kis-kis ke ye jan legi
wo qatil ada wo saba mahaki mahaki
savere savere mere ghar pe aayi
ae ‘hasrat’ wo bad-e-saba mahaki mahaki

Poet of the Poem / Ghazal or Nazam : Hasrat Jaipuri

Ye kya jane mein jana hai, jate ho khafa hokar
main tab janu mere dil se chale jao juda hokar
qayamat tak udegi dil se uthakar khak aankhon tak
isi raste gaya hai hasaraton ka kafila hokar
tumhin ab dard-e-dil ke naam se ghabraye jate ho
tumhin to dil mein shayad aaye the dard-e-ashiyan hokar
yun hi hamdam ghadi bhar ko mila karte to bahatar tha
ke dono waqt jaise roz milate hain juda hokar

Poet of the Poem / Ghazal or Nazam : Seemab Akbarabadi

Tu dost kisi ka bhi sitamgar na hua tha
auron pe hai wo zulm ki mujh par na hua tha
choda mah-e-nakhshab ke tarah dast-e-qaza ne
khurshid hanoz us ke barabar na hua tha
taufiq ba andaz-e-himmat hai azal se
aankhon mein hai wo qatara ki gohar na hua tha
jab tak ke na dekha tha qad-e-yar ka aalam
main motaqid-e-fitana-e-mahashar na hua tha
main sada dil aazurdagi-e-yar se khush hun
yani sabaq-e-shauq mukarrar na hua tha
dariya-e-maasi tunuk abhi se hua khushk
mera sar-e-daman bhi abhi tar na hua tha
jari thi asad dag-e-jigar se mere tahasil
aatashqada jagir-e-samandar na hua tha

Poet of the Poem / Ghazal or Nazam : Mirza Ghalib

Mohabbat ke tabiyat mein
ye kaisa bachapana qudarat ne rakkha hai
ke jitani purani jitani bhi mazabut ho jaye
ise taid-e-taza ke zarurat phir bhi rahati hai
yaqin ke aakhiri had tak dilon mein lahlahati ho
nigahon se tapakati ho lahu mein jagmagati ho
hazaron tarah se dilkash hasin hale banati ho
use izhar ke lafzon ke hajat phir bhi rahati hai
mohabbat mangati hai yun gavahi apne hone ke
ke jaise tifl-e-sada sham ko ik bij boye
aur shab mein baura uthe
zamin ko khod kar dekhe
ke paudha ab kahan tak hai
mohabbat ke tabiyat mein ajab takarar ke khu hai
ke ye iqrar ke lafzon ko sunane se nahi thakati
bichadane ke ghadi ho ya koi milane ke sa’at ho
ise bas ek hi dhun hai
kaho mujh se mohabbat hai
kaho mujh se mohabbat hai
kuch aisi besakuni hai wafa ke sarzaminon mein
ke jo ahal-e-mohabbat ko sada bechain rakhati hai
ke jaise phul mein khsuhbu ke jaise hath mein tara
ke jaise sham ka tara
mohabbat karne valon ke sahar raton mein rahati hai
gumanam ke shakhchon mein aashiyan banata hai ulfat ka
ye ain visal mein bhi hijr ke khadshon mein rahati hai
mohabbat ke musafir zindagi jab kat chukate hain
thakan ke karachiyan chunate wafa ke ajaraken pahane
samay ke rahguzar ke aakhiri sarhad pe rukate hain
to koi dubati sanson ke dori tham ker
dhire se kehta hai
ke ye sach hai na
hamari zindagi ik dusare ke naam likhi thi
dhundhalaka sa jo aankhon ke qarib-o-dur phaila hai
isi ka naam chahat hai
tumhen mujh se mohabbat thi
tumhen mujh se mohabbat hai
mohabbat ke tabiyat mein
ye kaisa bachapana qudarat ne rakkha hai

Poet of the Poem / Ghazal or Nazam : Amjad Islam Amjad

Tumhari anjuman se uth ke divane kahan jate
jo vabasta hue tum se wo afasane kahan jate
nikal kar dair-o-kaba se agar milta na maikhana
to thukaraye hue insan khuda jane kahan jate
tumhari berukhi ne laj rakh li badakhane ke
tum aankhon se pila dete to paimane kahan jate
chalo acha hua kam aa gai divanagi apni
vagarna hum zamane bhar ko samajhane kahan jate
‘qateel’ apna muqaddar gham se begana agar hota
phir to apane-paraye hum se pahachane kahan jate

Poet of the Poem / Ghazal or Nazam : Qateel Shifai

Tum ne dil ke baat kah di aj ye acha hua
hum tumhen apna samajhate the bada dhokha hua
jab bhi hum ne kuch kaha us ka asar ulata hua
aap shayad bhulate hain barha aisa hua
aap ke aankhon mein ye aansu kahan se aa gaye
hum to divane hain lekin aap ko ye kya hua
ab kisi se kya kahen ‘iqbal’ apni dastan
bas khuda ka shukr hai jo bhi hua acha hua

Poet of the Poem / Ghazal or Nazam : Iqbal Azeem

Zara si der ko aaye the khwab aankhon mein
phir us ke bad musalsal azab aankhon mein

wo jis ke naam ke nisbat se raushan tha vujud
khatak raha hai wohi aaftab aankhon mein

jinhen mata-e-dil-o-jan samajh rahe the hum
wo aaine bhi hue behijab aankhon mein
ajab tarah ka hai mausam ke khak udati hai
wo din bhi the ke khile the gulab aankhon mein
mere gazal teri vahashaton ke khair ki hai
bahut dinon se bahut iztarab aankhon mein
na jane kaisi qayamat ka peshkhema hai
ye uljhane teri be-intasab aankhon mein

Poet of the Poem / Ghazal or Nazam : Iftikhar Arif