Khuda hum ko aisi khudai na de
ki apne siva kuch dikhai na de
khatavar samajhegi duniya tujhe
ab itni bhi zyada safai na de
hanso aj itna ki is shor mein
sada sisakiyon ke sunai na de
abhi to badan mein lahu hai bahut
kalam chin le raushanai na de
mujhe apni chadar se yun dhanp lo
zamin aasaman kuch dikhai na de
gulami ko barakat samajhane lagen
asiron ko aisi rihai na de
mujhe aisi jannat nahi chahe
jahan se madina dikhai na de
main ashkon se nam-e-muhammad likhun
qalam chin le roshni na de
abhi to badan mein lahu hai bahut
qalam chin le roshanai na de
khuda aise irfan ka naam hai
rahe samane aur dikhai na de

Poet of the Poem / Ghazal or Nazam : Bashir Badr

Khamoshi kah rahi hai kan mein kya
aa raha hai mere guman mein kya

ab mujhe koi tokata bhi nahi
yahi hota hai khanadan mein kya
bolate kyon nahi mere haq mein
aabale par gaye zuban mein kya

meri har baat be-asar hi rahi
nuqs hai kuch mere bayan mein kya

wo mile to ye puchana hai mujhe
abhi hun main teri aman mein kya

sham hi se dukan-e-did hai band
nahi nukasan tak dukan mein kya
yun jo takata hai aasaman ko tu
koi rehta hai aasaman mein kya
ye mujhe chain q nahi padta
ik hi shakhs tha jahan mein kya

Poet of the Poem / Ghazal or Nazam : Jaun Eliya

Kahane ko bahut kuch tha magar kah nahi paye
samajha na mera gham koi is baat ka gham hai
phir bhi mere dil kuch to vafaon ke kasam hai
aankhon mein hon aansu bhi magar bah nahi paye
phoolon se chaman aasman taron se bhara hai
umeed ka daman mera yadon se bhara hai
qismat ne sitam aise kiye sah nahi paye

Poet of the Poem / Ghazal or Nazam : Sajan Bihari

main ne dil se kaha
ae divane bata
jab se koi mila
tu hai khoya hua
ye kahani hai kya
hai ye kya silasila
ae divane bata
main ne dil se kaha
ae divane bata
dhadakanon mein chupi
kaisi aavaz hai
kaisa ye geet hai
kaisa ye saz hai
kaisi ye baat hai
kaisa ye raz hai
ae divane bata
mere dil ne kaha
jab se koi mila
chand tare fiza
phul bhaunre hawa
ye hasin vadiyan
nila ye aasaman
sab hai jaise naya
mere dil ne kaha

Poet of the Poem / Ghazal or Nazam :Javed Akhtar

Kabe mein janbalab the hum duri-e-butan se
aaye hain phir ke yaron ab ke khuda ke yan se
jab kaundhati hai bijli tab janib-e-gulistan
rakhati hai ched mere khashak-e-ashiyan se
kya khubi us ke muh ke ae guncha naql kariye
tu to na bol zalim bu aati hai vahan se
khamoshi mein hi hum ne dekhi hai masalahat ab
har ik se hal dil ka muddat kaha zaban se
itni bhi bad mizaji har lahaza ‘meer tum ko
ulajhav hai zamin se, jhagada hai aasman se

Poet of the Poem / Ghazal or Nazam : Meer Taqi Meer

Kabe ke hai havas kabhi ku-e-butan ke hai
mujh ko khabar nahi meri matti kahan ke hai
kuch tazagi ho lazzat-e-azar ke liye
har dam mujhe talash naye aasaman ke hai
hasrat baras rahi hai mere mazar se
kahate hain sab ye qabr kisi naujavan ke hai
qasid ke guftagu se tasalli ho kis tarah
chipati nahi wo jo teri zaban ke hai
sun kar mera fasana-e-gam us ne ye kaha
ho jaye jhut sach, yahi khubi bayan ke hai
q kar na aae khuld se aadam zamin par
mauzun waheen wo khub hai, jo shay jahan ke hai
urdu hai jisaka naam hamin janate hain ‘dag’
hindustan mein dhum hamari zaban ke hai

Poet of the Poem / Ghazal or Nazam : DaaG Dehlvi

Labon pe narm tabassum racha ke dhul jayen
khuda kare mere aansu kisi ke kam aayen
jo ibtada-e-safar mein diye bujha baithe
wo badnasib kisi ka surag kya payen
talash-e-husn kahan le chali khuda jane
umang thi ki faqat zindagi ko apanayen
bula rahe hain ufaq par jo zard-ru tile
kaho to hum bhi fasane ke raz ho jayen
na kar khuda ke liye bar-bar zikr-e-bahisht
hum aasman ka mukarrar fareb kyon khayen
tamam maikada sunsan maigusar udas
labon ko khol kar kuch sochati hain minayen

Poet of the Poem / Ghazal or Nazam : Ahmed Nadeem Qasmi

Izn-e-khiram lete huye aasaman se hum
hatakar chale hain rahaguzar-e-karavan se hum
kyonkar hua hai fash zamane pe kya kahen
wo raz-e-dil jo kah na sake razdan se hum
hamdam yahi hai rahaguzar-e-yar-e-khushkhiram
guzri hain lakh bar isi kahakashan se hum
kya kya hua hai hum se junun mein na puchiye
ulajhe kabhi zamin se kabhi aasaman se hum
thukra diye hain aql-o-khirad ke sanamkade
ghabara chuke hain kashamakash-e-imtehan se hum
bakhshi hain hum ko ishq ne wo jurraten ‘majaz’
darate nahi siyasat-e-ahal-e-jahan se hum

Poet of the Poem / Ghazal or Nazam : Majaz Lucknawi