Ik aalam-e-hairat hai fana hai na baqa hai
hairat bhi ye hai ki kya janiye kya hai
sau bar jala hai to ye sau bar bana hai
hum sokhta janon ka nasheman bhi bala hai
hothon pe tabassum hai ki ek barq-e-bala hai
aankhon ka ishara hai ki sailab-e-fana hai
sunata hun bade gaur se afasana-e-hasti
kuch khwab hai kuch asl hai kuch tarz-e-ada hai
hai tere tasavvur se yahan nur ke barish
ye jan-e-hazin hai ki shabistan-e-hira hai
Poet of the Poem / Ghazal or Nazam : Asghar Gondvi
Din ko bhi itna andhera hai mere kamare mein
saya aate hue darta hai mere kamare mein
gham thaka hara musafir hai chala jayega
kuch dinon ke liye thahara hai mere kamare mein
subah tak dekhana afasana bana dalega
tujh ko ek shakhs ne dekha hai mere kamare mein
darbadar din ko bhatakata hai tasavvur mera
han magar raat ko rehta hai mere kamare mein
chor baitha hai kahan soch raha hun main ‘zafar’
kya koi aur bhi kamara hai mere kamare mein
Poet of the Poem / Ghazal or Nazam : Zafar Gorakhpuri
Dil ke bat kahi nahi jati, chup ke rahana thana hai
hal agar hai aisa hi to jee se jana jana hai
surkh kabhu hai aansu hoke zard kabhu hai muh mera
kya kya rang mohabbat ke hain, ye bhi ek zamana hai
fursat hai yan kam rahane ki, bat nahi kuch kahane ke
aankhen khol ke kan jo khole bazm-e-jahan afsana hai
teg tale hi us ke q na gardan dal ke ja baithen
sar to aakhirkar hamen bhi hath ke or jhukana hai
Poet of the Poem / Ghazal or Nazam : Meer Taqi Meer
Dil aur wo bhi tuta hua dil
ab zindagi hai jine ke qabil
kya zindagi ka ehasas-e-shamil
tere bagair ek garat-gari dil
hota hai jitana khun-e-tamanna
badati hai utani rangini-e-dil
josh-e-junun mein yak sa hai dono
kya gard-e-sehra, kya khak-e-manzil
taqdir-e-insan aur ye zamana
ek marg-e-asan aur wo bhi mushqil
lab par tabassum, aankhon mein aansu
hum likh rahen hain afsana-e-dil
‘taskeen’ se aksar hum bhi mile hain
kuch bhi ho lekin hai sahib-e-dil
Poet of the Poem / Ghazal or Nazam : Taskeen Qureshi
Bhulata lakh hun lekin barabar yaad aate hain
ilahi tark-e-ulfat par wo kyonkar yaad aate hain
na ched ae ham-nashin kaifiat-e-sahaba ke afsane
sharab-e-bekhudi ke mujh ko sagar yaad aate hain
raha karte hain qaid-e-hosh mein ae wai nakami
wo dasht-e-khud faramoshi ke chakkar yaad aate hain
nahi aati to yaad unaki mahinon bhar nahi aati
magar jab yaad aate hain to aksar yaad aate hain
haqiqat khul gai ‘hasrat’ tere tark-e-mohabbat ke
tujhe to ab wo pahale se bhi bad kar yaad aate hain
Poet of the Poem / Ghazal or Nazam : Hasrat Mohani
Badnam mere pyar ka afsana hua hai
divane bhi kahate hain ke divana hua hai
rishta tha tabhi to kisi bedard ne toda
apana tha tabhi to koi begana hua hai
badal ke tarah aa ke baras jaiye ik din
dil aap ke hote hue virana hua hai
bajate hain khayalon mai teri yad ke ghungaru
kuch din se mera ghar bhi parikhana hua hai
mausam ne banaya hai nigahon ko sharabi
jis phul ko dekhun vahi paimana hua hai
Poet of the Poem / Ghazal or Nazam : Poet Unknown
