Posts tagged: Ali Sardar Jafri Shayari

Tu mujhe itane pyar se mat dekh – Ali Sardar Jafri

Tu mujhe itane pyar se mat dekh
teri palkon ne narm saye mein
dhup bhi chandani si lagti hai
aur mujhe kitni dur jana hai
ret hai garm, panv ke chale
yun damakate hain jaise angare
pyar ke ye nazar rahe, na rahe
kon dasht-e-vafa mein jata hai
tere dil ko khabar rahe na rahe
tu mujhe itane pyar se mat dekh

Poet of the Poem / Ghazal or Nazam : Ali Sardar Jafri

Phir ek din aisa aayega – Ali Sardar Jafri

phir ek din aisa aayega
aankhon ke diye bujh jayenge
hathon ke kanval kumhalayenge
aur barg-e-zaban se nataq-va-sada
ke har titali ud jayegi
ik kale samandar ke tah mein
kaliyon ke tarah se khilati hui
phoolon ke tarah se hansati hui
sari shaklen kho jayengi
khoon ke gardish dil ke dhadakan
sab ranginiyan so jayengi
aur nili faza ke makhmal par
hansati hui hire ke ye kani
ye meri jannat meri zamin
is ke subahen is ke shamen
bejane hue besamajhe hue
ik musht gubar-e-insan par
shabanam ke ro jayengi
har cheez bhula di jayegi
yadon ke hasin butkhane se
har cheez utha di jayegi
phir koi nahi ye puchega
‘sardar’ kahan hai mahafil mein
lekin main yahan phir aaunga
bachon ke dahan se bolunga
chidiyon ke zaban se gaunga
jab bij hansenge dharati mein
aur konpalen apni ungali se
matti ke tahon ko chedengi
main patti patti kali kali
apni aankhen phir kholunga
sar sabz hatheli par lekar
shabanam ke qatre tulunga
main rang-e-hena aahang-e-gazal
andaz-e-sukhan ban jaunga
rukhsar-e-urus-e-nau ke tarah
har aanchal se chan jaunga
jadon ke havayen daman mein
jab fasal-e-khazan ko layengi
rahru ke jawan qadmon ke tale
sukhe hue patton se mere
hansane ke sadayen aayengi
dharati ke sunahari sab nadiyan
aakash ke nili sab jhilen
hasti se meri bhar jayengi
aur sara zamana dekhega
har qissa mera afsana hai
har aashiq hai saradar yahan
har mashuqa sultana hai
main ek gurezan lamha hun
ayyam ke afsunkhane mein
main ek tadapata qatra hun
masaruf-e-safar jo rehta hai
mazi ke surahi ke dil se
mustaqbil ke paimane mein
main sota hun aur jagata hun
aur jag ke phir so jata hun
sadiyon ka purana khel hun main
main mar ke amar ho jata hun

Poet of the Poem / Ghazal or Nazam :Ali Sardar Jafri

Kam ab koi na aayega bas ik dil ke siva – Ali Sardar Jafri

Kam ab koi na aayega bas ik dil ke siva
raste band hain sab kucha-e-qatil ke siva
bais-e-rashq hai tanharavi-e-rahrau-e-shauq
hamsafar koi nahi duri-e-manzil ke siva
hum ne duniya ke har ik shai se uthaya dil ko
lekin ik shokh ke hangama-e-mahafil ke siva
teg munsif ho jahan dar-o-rasan hon shahid
begunah kon hai us shahar mein qatil ke siva
jane kis rang se aayi hai gulshan mein bahar
koi nagma hi nahi shor-e-silasil ke siva

Poet of the Poem / Ghazal or Nazam : Ali Sardar Jafri

sirf lahara ke rah gaya aanchal – Ali Sardar Jafri

sirf lahara ke rah gaya aanchal
rang ban kar bikhar gaya koi
gardish-e-khun ragon mein tez hui
dil ko chukar guzar gaya koi
phul se khil gaye tasavvur mein
daman-e-shauq bhar gaya koi

Poet of the Poem / Ghazal or Nazam :Ali Sardar Jafri

Meri vadi mein wo ik din yun hi aa nikali thi

meri vadi mein wo ik din yun hi aa nikali thi
rang aur nur ka bahata hua dhara ban kar
mahafil-e-shauq mein ik dhum macha di us ne
khalvat-e-dil mein rahi anjuman-ara ban kar

shola-e-ishq sar-e-arsh ko jab chune laga
ud gai wo mere sine se sharara ban kar
aur ab mere tasavvur ka ufaq roshan hai
wo chamakati hai jahan gham ka sitara ban kar

Poet of the poem/ghazal or Nazam: Ali Sardar Jafri

Ek ju-e-dard dil se jigar tak ravan hai aj

ek ju-e-dard dil se jigar tak ravan hai aj
pighala hua ragon mein ik aatish-fishan hai aj
lab si diye hain ta na shikayat kare koi
lekin har ek zakhm ki muh mein zaban hai aj

tarikiyon ne gher liya hai hayat ko
lekin kisi ka ru-e-hasin darmiyan hai aj
jine ka waqt hai yahi marane ka waqt hai
dil apni zindagi se bahut shadaman hai aj
ho jata hun shahid har ahal-e-vafa ki sath
har dastan-e-shauq meri dastan hai aj

aaye hain kis nishat se hum qatl-gah mein
zakhmon se dil hai chur nazar gul-fishan hai aj

zindaniyon ne tod diya zulm ka gurur
wo dab-daba wo raub-e-hukumat kahan hai aj

Poet of the poem/ghazal or Nazam: Ali Sardar Jafri








Ali Sardar Jafri Shayari, poems and Ghazals


Ali Sardar Jafri Shayari shayari sms in Urdu for your friends. Ali Sardar Jafri Shayari poetry , ghazal , poem and sheri o shayri in Hindi. Best 1 line , 2 line and 4 line Ali Sardar Jafri Shayari shayari Collection Online.