Posts tagged: Anwar Masood Poetry

raat aayi hai balaon se rihai degi -Anwar Masood

raat aayi hai balaon se rihai degi
ab na divar na zanjir dikhai degi
waqt guzra hai pa mausam nahi badala yaro
aisi gardish hai zamin khud bhi duhai degi
ye dhundalaka sa jo hai us ko ganimat jano
dekhana phir koi surat na sujhai degi
dil jo tutega to ik turfa tamasha hoga
kitne aainon mein ye shaql dikhai degi
sath ke ghar mein bada shor barpa hai ‘anwar’
koi aayega to dastak na sunai degi

Poet of The / Ghazal or Nazam :    Anwar Masood

Jis tarah ke hain ye divaren ye dar jaisa bhi hai – Anwar Masood

jis tarah ke hain ye divaren ye dar jaisa bhi hai
sar chipane ko mayassar to hai ghar jaisa bhi hai
us ko mujh se mujh ko us se nisbaten hain beshumar
meri chahat ka hai mahavar ye nagar jaisa bhi hai
chal pada hun shauq-e-beparvah ko murshad man kar
rasta purpech hai ya purkhatar jaisa bhi hai
sab gavara hai thakan sari dukhan sari chubhan
ek khushbu ke liye hai ye safar jaisa bhi hai
wo to hai makhsus ik teri mohabbat ke liye
tera ‘anwar’ bahunar ya behunar jaisa bhi hai

Poet of the Poem / Ghazal or Nazam :Anwar Masood








Anwar Masood Poetry, poems and Ghazals