|
Wo gazal valon ka uslub samajhate honge
chand kahate hain kise khub samajhate honge
itni milati hai meri ghazlon se surat teri
log tujh ko mera mahbub samajhate honge
main samajhata tha muhabbat ke zaban khushbu hai
phul se log ise khub samajhate honge
bhool kar apna zamana ye zamane wale
aj ke pyar ko mayub samajhate honge
Poet of the Poem / Ghazal or Nazam : Bashir Badr
Ye chirag benazar hai ye sitara bezuban hai
abhi tujhase milta julata koi dusara kahan hai
wohi shakhs jisape apne dil-o-jan nisar kar dun
wo agar khafa nahi hai to zarur badaguman hai
kabhi pa ke tujh ko khona kabhi kho ke tujh ko pana
ye janam janam ka rishta tere mere daramiyan hai
mere sath chalanevale tujhe kya mila safar mein
wohi dukh bhari zamin hai wohi gham ka aasman hai
main isi guman mein barason bada mutmain raha hun
tera jism betagaiyyur hai mera pyar javidan hai
unhin raston ne jin par kabhi tum the sath mere
mujhe rok rok pucha tera hamasafar kahan hai
Poet of the Poem / Ghazal or Nazam :Bashir Badr
Ye chandani bhi jin ko choote hue darati hai
duniya unhin phoolon kopairon se masalati hai
shoharat ke bulandi bhi pal bhar ka tamasha hai
jis dal pe baithe ho wo toot bhi sakati hai
loban mein chingari jaise koi rakh de
yun yaad teri shab bhar sine mein sulagati hai
aa jata hai khud khench kar dil sine se patari par
jab raat ke sarahad se ik rel guzarati hai
aansu kabhi palkon par ta der nahi rukate
ud jate hain ue panchi jab shakh lachakati hai
khush rang parindon ke laut aane ke din aaye
bichde hue milate hain jab barf pighalati hai
Poet of the Poem / Ghazal or Nazam :Bashir Badr
Yun hi besabab na phira karo, koi sham ghar bhi raha karo
wo gazal ke sachi kitab hai, use chupke chupke pada karo
koi hath bhi na milayega, jo gale miloge tapak se
ye naye mizaj ka shahar hai, zara fasale se mila karo
abhi reh mein kai mod hain, koi aayega koi jayega
tumhen jisne dil se bhula diya use bhulane ke dua karo
mujhe ishtahar si lagti hain, ye mohabbaton ke kahaniyan
jo kaha nahi wo suna karo, jo suna nahi wo kaha karo
kabhi husn-e-pardanashin bhi ho zara aashiqana libas mein
jo main ban-sanvar ke kaheen chalun, mere sath tum bhi chala karo
ye khiza ke zard-si sham men, jo udas ped ke pas hai
ye tumhare ghar ke bahar hai, ise aansuon se hara karo
nahi behijab wo chand sa ki nazar ka koi asar nahi
use tani garmi-e-shauq se badi der tak na taka karo
Poet of the Poem / Ghazal or Nazam : Bashir Badr
wohi taj hai wohi takht hai wohi zeher hai wohi jam hai
ye wohi khuda ke zamin hai ye wohi buton ka nizam hai
bade shauq se mera ghar jala koi aanch na tujhape aayegi
ye zuban kisi ne kharid li ye qalam kisi ka gulam hai
main ye manata hun mere diye teri aandhiyon ne bujha diye
magar ik jugnu hawaon mein abhi roshni ka imam hai
Poet of the Poem / Ghazal or Nazam :Bashir Badr
Yaad kisi ke chandani ban kar kothe kothe utari hai
yaad kisi ke dhup hui hai zina zina utari hai
raat ke rani sahan-e-chaman mein gesu khole soti hai
rat-berat udhar mat jana ik nagin bhi rahati hai
tum ko kya tum gazalen kah kar apni aag bujha loge
us ke jee se pucho jo pathar ke tarah chup rahati hai
pathar lekar galiyon galiyon ladake pucha karte hain
har basti mein mujh se aage shoharat meri pahunchati hai
muddat se ik ladaki ke rukhsar ke dhup nahi aayi
isi liye mere kamare mein itni thandak rahati hai
Poet of the Poem / Ghazal or Nazam :Bashir Badr
Wo thaka hua meri bahon mein zara so gaya tha to kya hua
abhi main ne dekha hai chand bhi kisi shakh-e-gul pe jhuka hua
jise le gai hai abhi hawa wo varaq tha dil ke kitab ka
kaheen aansuon se mita hua kaheen aansuon se likha hua
kai mil ret ko kat kar koi mauj phul khila gai
koi ped pyas se mar raha hai nadi ke pas khada hua
mujhe hadason se saja saja ke bahut hasin bana diya
mera dil bhi jaise dulhan ka hath ho mehandiyon se racha hua
wohi khat ke jis pe jagah jagah do mahakate honton ke chand the
kisi bhule-bisare se taq par tah-e-gard hoga daba hua
vahii shahar hai wohi raste wohi ghar hai aur wohi lan bhi
magar us dariche se puchana wo darakht anar ka kya hua
mere sath jugnu hai hamsafar magar is sharar ke bisat kya
ye charag koi charag hai na jala hua na bujha hua
Poet of the Poem / Ghazal or Nazam : Bashir Badr
Sun li jo khuda ne wo dua tum to nahi ho
daravaze pe dastak ke sada tum to nahi ho
simati hui sharmai hui raat ke rani
soi hui kaliyon ke haya tum to nahi ho
mahasus kiya tum ko to gili hui palken
bhige huye mausam ke ada tum to nahi ho
in ajanabi rahon mein nahi koi bhi mera
kis ne mujhe yun apna kaha tum to nahi ho
Poet of the Poem / Ghazal or Nazam : Bashir Badr
