mit gaya jab mitane vala phir salam aaya to kya
dil ke barbadi ke bad un ka payam aaya to kya
chut gain nabzen ummiden dene vali hain javab
ab udhar se namabar leke payam aaya to kya
aj hi mitana tha ae dil hasarat-e-didar mein
tu meri nakamiyon ke bad kam aaya to kya
kash apni zindagi mein hum ye manzar dekhte
ab sar-e-turbat koi mahashar-khiram aaya to kya
sans ukhadi aas tuti cha gaya jab rang-e-yas
namabar laya to kya khat mere naam aaya to kya
mil gaya wo khak mein jis dil mein tha arman-e-did
ab koi khurshid-vash bala-e-bam aaya to kya

 
Poet of the Poem / Ghazal or Nazam il Shahjahanpuri

misl-e-khayal aaye the aa kar chale gaye
duniya hamari gham ke basa kar chale gaye
phoolon ke aas dil se lagaye hue the hum
kante wo raste mein bicha kar chale gaye
aayi na thi hamare chaman mein bahar abhi
wo khwab aashiyan mein laga kar chale gaye
bhule se bhi kabhi na dil hum bhula sake
dil se hamen wo apne bhula kar chale gaye

 
Poet of the Poem / Ghazal or Nazam :Fani Badayuni

meri zindagi pe na muskara mujhe zindagi ka alam nahi
jise tere gham se ho vasta wo khizan bahar se kam nahi
mera kufr hasil-e-zud hai mera zud hasil-e-kufr hai
meri bandagi wo hai bandagi jo rahin-e-dair-o-haram nahi
mujhe ras aaye khuda kare yahi ishtibah ke saten
unhen aitabar-e-vafa to hai mujhe aitabar-e-sitam nahi
wohi karavan wohi raste wohi zindagi wohi marahale
magar apane-apane muqam par kabhi tum nahi kabhi hum nahi
na wo shan-e-jabr-e-shabab hai na wo rang-e-qahar-e-itab hai
dil-e-beqarar pe in dinon hai sitam yahi ki sitam nahi
na fana meri na baqa meri mujhe ae ‘shakeel’ na dhundiye
main kisi ka husn-e-khayal hun mera kuch vujud-o-adam nahi

Poet of the Poem / Ghazal or Nazam :Shakeel Badayuni

meri zindagi pe na muskara mujhe zindagi ka alam nahi
jise tere gham se ho vasta wo khizan bahar se kam nahi
mera kufr hasil-e-zud hai mera zud hasil-e-kufr hai
meri bandagi wo hai bandagi jo rahin-e-dair-o-haram nahi
mujhe ras aaye khuda kare yahi ishtibah ke saaten
unhen aitabar-e-vafa to hai mujhe aitabar-e-sitam nahi
wohi karavan wohi raste wohi zindagi wohi marahale
magar apane-apane muqam par kabhi tum nahi kabhi hum nahi
na wo shan-e-jabr-e-shabab hai na wo rang-e-qahar-e-itab hai
dil-e-beqarar pe in dinon hai sitam yahi ki sitam nahi
na fana meri na baqa meri mujhe ae ‘shakeel’ na dhundiye
main kisi ka husn-e-khayal hun mera kuch vujud-o-adam nahi

Poet of the Poem / Ghazal or Nazam : Shakeel Badayuni

meri zindagi kisi aur ki, mere naam ka koi aur hai
mera aks hai sar-e-aina, pase aaina koi aur hai
meri dhadakanon mein hai chap si, ye judai bhi hai milap si
mujhe kya pata, mere dil bata, mere sath kya koi aur hai
na gae dinon ko khabar meri, na sharik-e-hal nazar teri
tere des men, mere bhes men, koi aur tha koi aur hai
wo meri taraf nigaran rahe, mera dhyan jane kahan rahe
meri aankh mein kai suraten, mujhe chahata koi aur hai

Poet of the Poem / Ghazal or Nazam : Muzaffar Warsi

Khabar-e-tahayyur-e-ishq sun na junun raha na pari rahi
na to tu raha na to main raha, jo rahi so bekhabari rahi
shah-e-bekhudi ne ata kiya mujhe ab libas-e-barahanagi
na khirad ke bakhiyagari rahi na junun ke pardadari rahi
chali simt-e-gaib se ik hawa ki chaman zahur ka jal gaya
magar ek shakh-e-nihal-e-gham jise dil kahen so hari rahi
nazar-e-tagaful-e-yar ka gila kis zaban son bayan karun
ki sharab-e-sad-qadah aarzoo khum-e-dil mein thi so bhari rahi
wo ajab ghadi thi main jis ghadi liya dars-e-nuskha-e-ishq ka
ki kitab-e-aql ke taq mein jyun dhari thi tyun hi dhari rahi
tere josh-e-hairat-e-husn ka asar is qadar son yahan hua
ki na aaine mein rahi jila na pari kun jalva-gari rahi
kiya khak aatish-e-ishq ne dil-e-benava-e-”siraj” kon
na khatar raha na hazar raha magar ek bekhatari rahi

Poet of the Poem / Ghazal or Nazam : Siraj Aurangabadi

Khamoshi khud apni sada ho aisa bhi ho sakata hai
sannata hi gunj raha ho aisa bhi ho sakata hai
mera mazi mujh se bichad kar kya jane kis hal mein hai
meri tarah wo bhi tanha ho aisa bhi ho sakata hai
sahara sahara kab tak main dhundhun ulfat ka ek aalam
aalam aalam ik sahara ho aisa bhi ho sakata hai
ahl-e-tufan soch rahe hain sahil duba jata hai
khud un ka dil dub raha ho aisa bhi ho sakata hai

Poet of the Poem / Ghazal or Nazam : Zaka Siddiqui

Khalish-e-hijr-e-dayami na gai
tere rukh se ye berukhi na gai
puchate hain ke kya hua dil ko
husn valon ke sadagi na gai
sar se sauda gaya muhabbat ka
dil se par is ke bekali na gai
aur sab ke hikayaten kah din
baat apni kabhi kahi na gai
hum bhi ghar se ‘munir’ tab nikle
baat apanon ke jab sahi na gai

Poet of the Poem / Ghazal or Nazam : Munir Niazi