Ye bhi nahi bimar na the
itane junun aasar na the
logon ka kya zikr karen
hum bhi kam ayyar na the
ghar mein aur bahut kuch tha
sirf dar-o-divar na the
sab par hansana shevah tha
jab tak khud us par na the
teri khabar mil jati thi
shahar mein jab akhbar na the
pahale bhi sab kuch bikata tha
khwabon ke bazar na the
maut
ke baten pyari thin
marane ko tayyar na the

Poet of the Poem / Ghazal or Nazam : Ashufta Changezi

Shola hun bhadakane ke guzarish nahi karta
sach muh se nikal jata hai koshish nahi karta
girti hui divar ka hamdard hun lekin
chadte hue suraj ke parastish nahi karta
mathe ke pasine ke mahak aaye to dekhen
wo khoon mere jism mein gardish nahi karta
hamdardi-e-ahbab se darta hun ‘muzaffar’
main zakhm to rakhta hun numaish nahi karta

Poet of the Poem / Ghazal or Nazam : Muzaffar Warsi

Puchate ho to suno kaise basar hoti hai
raat khairat ke sadqe ke sahar hoti hai
sans bharne ko to jina nahi kahate ya rab
dil hi dukhata hai na ab aasteen tar hoti hai
jaise jagi hui aankhon mein chubhen kanch ke khwab
raat is tarah divanon ke basar hoti hai
gham hi dushman hai mera gham hi ko dil dhundhata hai
ek lamhe ke judai bhi agar hoti hai
ek markaz ke talash ek bhatakati khushbu
kabhi manzil kabhi tamhid-e-safar hoti hai

Poet of the Poem / Ghazal or Nazam : Meena Kumari ‘Naaz

Khuda jane kahan hai ‘asghar’-e-divana barason se
ki us ko dhundhate hain ka’aba-o-butakhana barason se
tadapana hai na jalana hai na jalakar khak hona hai
ye kyon soi hui hai fitrat-e-paravana barason se

koi aisa nahi yarab ki jo is dard ko samajhe
nahi malum kyon khamosh hai divana barason se

hasinon par na rang aaya na phoolon mein bahar aayi
nahi aaya jo lab par nagma-e-mastana barason se

Poet of the Poem / Ghazal or Nazam : Asghar Gondvi

Kamal-e-ishq hai divana ho gaya hun main
ye kis ke hath se daman chuda raha hun main

tumhin to ho jise kahati hai nakhuda duniya
bacha sako to bacha lo ki dubata hun main

ye mere ishq ke majaburiyan ma’az-ALLAH
tumhara raz tumhin se chupa raha hun main

is ik hijab pe sau be-hijabiyan sadaqe
jahan se chahata hun tumko dekhata hun main

batane wale waheen par batate hain manzil
hazar bar jahan se guzar chuka hun main
kabhi ye zom ki tu mujh se chup nahi sakata
kabhi ye vaham ki khud bhi chupa hua hun main

mujhe sune na koi mast-e-bada-e-isharat
‘majaz’ tute huye dil ke ik sada hun main

Poet of the Poem / Ghazal or Nazam : Majaz Lucknawi

mausam ko isharon se bula q nahi lete
rutha hai agar wo to mana q nahi lete
divana tumhara koi gair nahi hai
machala bhi to sine se laga q nahi lete
khat likh kar kabhi aur kabhi khat ko jalakar
tanhai ko rangin bana q nahi lete
tum jag rahe ho mujh ko acha nahi lagata
chupke se meri neend chura q nahi lete

Poet of the Poem / Ghazal or Nazam :Zafar Gorakhpuri

mastana piye ja yun hi mastana piye ja
paimana to kya cheez hai maikhana piye ja
kar garq may-o-jam gam-e-gardish-e-ayyam
ab ae dil-e-nakam tu maikhana piye ja

may-noshi ke aadab se aagah nahi tu
jis tarah kahe saqi-e-maikhana piye ja

is basti mein hai vahashat-e-masti hi se hasti
divana ban aur bada-e-divana piye ja
maikhane ke hangamen hain kuch der ke mehaman
hai subah qarib “akhtar” divana piye ja

Poet of the Poem / Ghazal or Nazam :Akhtar Shirani

Kachi divar hun thokar na lagana mujh ko
apni nazron mein basa kar na girna mujh ko
tum ko aankhon mein tasavvur ke tarah rakhta hun
dil mein dhadakan ke tarah tum bhi basana mujh ko
baat karne mein jo mushkil ho tumhen mahafil mein
main samajh jaunga nazron se batana mujh ko
wada utana hi karo jitana nibha sakate ho
khwab pura jo na ho wo na dikhana mujh ko
apne rishte ke nazakat ka bharam rakh lena
main to aashiq hun divana na banana mujh ko

Poet of the Poem / Ghazal or Nazam : Israr Ansari