Ye jo divane se do char nazar aate hain
in mein kuch sahib-e-asrar nazar aate hain
teri mahafil ka bharam rakahate hain so jat ehain
warna ye log to bedar nazar aate hain
dur tak koi sitara hai na koi jugnu
marg-e-ummid ke aasar nazar aate hain
mere daman mein shararon ke siva kuch bhi nahi
aap phoolon ke kharidar nazar aate hain
kal jise chu nahi sakati thi farishton ke nazar
aj wo raunaq-e-bazar nazar aate hain
hashr mein kon gavahi meri dega ‘sagar’
sab tumhare hi tarafdar nazar aate hain
Poet of the Poem / Ghazal or Nazam : Sagar Siddiqui
maut ik geet raat gati thi
zindagi jhum-jhum jati thi
kabhi divane ro bhi padate the
kabhi teri bhi yaad aati thi
kis ke matam mein chand taron se
raat bazm-e-aza sajati thi
rote jate the tere hijr nasib
raat furqat ke dhalati jati thi
khoi khoi si rahati thi wo aankh
dil ka har bhed pa bhi jati thi
zikr tha rang-o-bu ka au’ dil mein
teri tasvir utarati jati thi
husn mein thi in aansuon ke chamak
zindagi jin mein muskurati thi
dard-e-hasti chamak utha jis mein
wo hum ahal-e-vafa ke chati thi
tere un aansuon ke yaad aayi
zindagi jin mein muskurati thi
tha sukut-e-faza tarannum-rez
bu-e-gesu-e-yar gati thi
gam-e-janan ho yan gam-e-dauran
lau si kuch dil mein jhil-milati thi
zindagi ko wafa ke rahon mein
maut khud roshni dikhati thi
baat kya thi ki dekhte hi tujhe
ulfat-e-zist bhool jati thi
the na afalak gosh bar aavaz
bekhudi dastan sunati thi
karavaten le ufaq pe jaise subah
koi doshiza ras-masati thi
zindagi zindagi ko vaqt-e-safar
karavan-karavan chupati thi
samane tere jaise koi baat
yaad aa-a ke bhool jati thi
wo tera gham ho ya gam-e-duniya
shamma-si dil mein jhil-milati thi
gham ke wo dastan-e-nim-shabi
aasmanon koo neend aati thi
maut bhi gosh bhar sada thi “firaq”
zindagi koi geet gati thi
Poet of the Poem / Ghazal or Nazam :Firaq Gorakhpuri
Ishq kya cheez hai ye puchiye paravane se
zindagi jis ko mayassar hui jal jane se
maut ka khauf ho kya ishq ke divane ko
maut khud kanpati hai ishq ke divane se
ho gaya dher waheen aah bhi nikali na koi
jane kya baat kahi shama ne paravane se
husn be-ishq kaheen rah nahi sakata zinda
bujh gai shama bhi paravane ke jal jane se
khaye jati hai nadamat mujhe is gafalat ke
hosh mein aa ke chala aaya hun mayakhane se
kar diya gardish-e-ayyam ne rusva “sahir”
mujh ko shikwa hai yagane se na begane se
Poet of the Poem / Ghazal or Nazam : Sahir Hoshiarpuri
In aankhon ke masti ke mastane hazaron hain
in aankhon se vabasta afasane hazaron hain
ik tum hi nahi tanha ulafat mein meri rusava
is shahar mein tum jaise divane hazaron hain
ik sirf hum hi may ko aankhon se pilate hain
kahane ko to duniya mein maikhane hazaron hain
is shamm-e-farozan ko aandhi se darate ho
is shamm-e-farozan ke paravane hazaron hain
Poet of the Poem / Ghazal or Nazam : Shahryar
Dur se aaye the saqi sun ke maikhane ko hum
bas tarasate hi chale afasos paimane ko hum
may bhi hai mina bhi hai sagar bhi hai saqi nahi
dil mein aata hai laga den aag maikhane ko hum
hum ko fasana tha qafaz mein kya gila sayyad ka
bas tarasate hi rahe hain aab aur dane ko hum
bag mein lagata nahi sahara mein ghabarata hai dil
ab kahan le jake baithen aise divane ko hum
kya hui taqasir hum se tu bata de ae ‘nazeer’
taki shadi marg samajhen aise mar jane ko hum
Poet of the Poem / Ghazal or Nazam : Nazeer Akbarabadi
