Yun na mil mujh se khafa ho jaise
sath chal mauj-e-saba ho jaise
log yun dekh kar hans dete hain
tu mujhe bhool gaya ho jaise
ishq ko shirk ke had tak na bada
yun na mil hum se khuda ho jaise
maut bhi aayi to is naz ke sath
mujhape ehsaan kiya ho jaise
aise anjan bane baithe ho
tum ko kuch bhi na pata ho jaise
hichakiyan raat ko aati hi rahin
tu ne phir yaad kiya ho jaise
zindagi bit rahi hai “danish”
ek bejurm saza ho jaise
Poet of the Poem / Ghazal or Nazam : Ehsan Danish
Kabhi mujh ko sath lekar, kabhi mere sath chal kar
wo badal gaye achanak meri zindagi badal kar
huye jis pe meharaban tum koi khushnasib hoga
meri hasaraten to nikalin mere aansuon mein dhal ke
teri zulf-o-rukh ke qurban dil-e-zar dhundhata hai
wohi champai ujale wohi suramai dhundalake
koi phul ban gaya hai koi chand koi tara
jo chirag bujh gaye hain teri anjuman mein jal ke
mere dosto khudara mere sath tum bhi dhundo
wo yahin kaheen chupe hain mere gham ka rukh badal ke
teri bejhijhak hansi se na kisi ka dil ho maila
ye nagar hai aainon ka yahan sans le sambhal ke
Poet of the Poem / Ghazal or Nazam : Ehsan Danish
