|
saqi teri mahafil mein hum jam uchalenge
jab kabe mein jayenge zamzam se naha lenge
hum dastnavardi ka kuch aur maza lenge
manzil pe bhi talvon ke kante na nikalenge
hum gulshan-e-fitarat se jine ke ada lenge
shakhon se lachak lenge kanton se ana lenge
Poet of the Poem / Ghazal or Nazam :Fana Nizami Kanpuri
mere chehare se gham aashakara nahi
ye na samajho ke main gham ka mara nahi
dubne ko to dube magar naz hai
ahl-e-sahil ko hum ne pukara nahi
yun dikhata hai aankhen hamen bagban
jaise gulshan pe kuch haq hamara nahi
zikr-e-saqi hi kafi nahi ae ‘fana’
bepiye maikade mein guzra nahi
Poet of the Poem / Ghazal or Nazam :Fana Nizami Kanpuri
jab bhi nazm-e-maikada badala gaya
ek na ek jam-e-hasin toda gaya
jab safina mauj se takra gaya
nakhuda ko bhi khuda yaad aa gaya
main ne cheda qissa-e-jaur-e-falak
jane q un ko pasina aa gaya
dekh kar un ke jafaon ka khulus
main wafa ke naam par sharma gaya
aap ab aayen hain aansu ponchane
jab mere daman pe dhabba aa gaya
Poet of the Poem / Ghazal or Nazam :Fana Nizami Kanpuri
Din guzar gaya aitabar mein
raat kat gai intazar mein
wo maza kahan vasl-e-yar mein
lutf jo mila intazar mein
un ke ik nazar kam kar gai
hosh ab kahan hoshiyar mein
mere kase mein kayenat hai
main hun aap ke ikhtiyar mein
aankh to uthi phul ke taraf
dil ulajh gaya husn-e-khar mein
tum se kya kahen kitne gham sahe
hum ne be-vafa tere pyar mein
fikr-e-ashiyan har khizam ke
aashiyan jala har bahar mein
kis tarah ye gham bhool jaye hum
wo juda hua is bahar mein
Poet of the Poem / Ghazal or Nazam : Fana Nizami Kanpuri
Dil se agar kabhi tera araman jayega
ghar ko lagake aag ye mehaman jayega
sab honge us se apne ta’arruf ke fikr mein
mujh ko mere sukut se pehchan jayega
is kufr-e-ishq se mujhe kyon rokate ho tum
iman valo mera hi iman jayega
aj us se main ne shikwa kiya tha shararatan
kis ko khabar thi itna bura man jayega
ab us muqam par hain meri beqarariyan
samajhane vala hoke pasheman jayega
duniya pe aisa waqt padega ki ek din
insan ke talash mein insan jayega
Poet of the Poem / Ghazal or Nazam : Fana Nizami Kanpuri
