Tune dekha hai kabhi ek nazar sham ke bad
kitne chup-chap se lagate hain shajar sham ke bad
itane chup-chap ke raste bhi rahenge la-ilm
chod jayenge kissi roz nagar sham ke bad
main ne aisee hi gunah teri judai mein kiye
jaise tufan mein koi chod de ghar sham ke bad
sham se pahale wo mast apni udanon mein raha
jis ke hathon mein the tute hue par sham ke bad
raat biti to gine aable aur phir socha
kon tha bais-e-agaz-e-safar sham ke bad
tu hai suraj tujhe malum kahan raat ka dukh
tu kisi roz mere ghar mein utar sham ke bad
laut aaye na kissi roz wo aawara majaz
khol rakhte hain isi aas pe dar sham ke bad
Poet of the Poem / Ghazal or Nazam : Farhat Abbas Shah
Samay samay ke khalish mein tera malal rahe
judaiyon mein bhi yun aalam-e-visal rahe
ana ke jang mein hum jit to gaye lekin
phir us ke bad bahut der tak nidhal rahe
rah-e junun mein yahi zad-e-rah hota hai
ke justaju bade divanagi bahal rahe
hasin raten bhi mahaken tumhari yadon se
kade dinon mein bhi pal pal tera khayal rahe
tu ek bar zara kishtiyan jala to sahi
hai kya majal ke ek lamha bhi zaval rahe
Poet of the Poem / Ghazal or Nazam : Farhat Abbas Shah
main ne dekha divanon ko sham ke bad
dhundh rahe the viranon ko sham ke bad
tariki phir sare aib chupa legi
le aana ghar mahamanon ko sham ke bad
main ne us ka sog manaya kuch aisa
khali rakha paimanon ko sham ke bad
yaad kare jab mujh ko teri tanhai
dekha karana guldanon ko sham ke bad
“farhat” chand ke khauf se kar leta hun band
kamare ke raushandanon ko sham ke bad
Poet of the Poem / Ghazal or Nazam :Farhat Abbas Shah
aag ho to jalane mein der kitani lagati hai
barf ke pighalane mein der kitani lagati hai
chahe koi ruk jaye chahe koi rah jaye
qafilon ko chalane mein der kitani lagati hai
chahe koi jaisa bhi hamsafar ho sadiyon se
rasta badalane mein der kitani lagati hai
ye to vaqt ke bas mein hai ke kitani mohalat de
varna bakht dhakane mein der kitani lagati hai
mom ka badan lekar dhup mein nikal aana
aur phir pighalane mein der kitani lagati hai
soch ke zaminon mein raste juda hon to
dur ja nikalane mein der kitani lagati hai
Poet of the Poem / Ghazal or Nazam : Farhat Abbas Shah
