|
Wo gazal valon ka uslub samajhate honge
chand kahate hain kise khub samajhate honge
itni milati hai meri ghazlon se surat teri
log tujh ko mera mahbub samajhate honge
main samajhata tha muhabbat ke zaban khushbu hai
phul se log ise khub samajhate honge
bhool kar apna zamana ye zamane wale
aj ke pyar ko mayub samajhate honge
Poet of the Poem / Ghazal or Nazam : Bashir Badr
Yun hi besabab na phira karo, koi sham ghar bhi raha karo
wo gazal ke sachi kitab hai, use chupke chupke pada karo
koi hath bhi na milayega, jo gale miloge tapak se
ye naye mizaj ka shahar hai, zara fasale se mila karo
abhi reh mein kai mod hain, koi aayega koi jayega
tumhen jisne dil se bhula diya use bhulane ke dua karo
mujhe ishtahar si lagti hain, ye mohabbaton ke kahaniyan
jo kaha nahi wo suna karo, jo suna nahi wo kaha karo
kabhi husn-e-pardanashin bhi ho zara aashiqana libas mein
jo main ban-sanvar ke kaheen chalun, mere sath tum bhi chala karo
ye khiza ke zard-si sham men, jo udas ped ke pas hai
ye tumhare ghar ke bahar hai, ise aansuon se hara karo
nahi behijab wo chand sa ki nazar ka koi asar nahi
use tani garmi-e-shauq se badi der tak na taka karo
Poet of the Poem / Ghazal or Nazam : Bashir Badr
Kal chaudhavin ke raat thi shab bhar raha charcha tera
kuch ne kaha ye chand hai kuch ne kaha chehara tera
hum bhi waheen maujud the hum se bhi sab pucha kiye
hum hans diye hum chup rahe manzur tha parda tera
is shahar mein kis se milen hum se to chuti mahafilen
har shakhs tera naam le har shakhs divana tera
kuche ko tere chod kar jogi hi ban jayen magar
jangal tere parbat tere basti teri sahara tera
hum aur rasm-e-bandagi aashuftagi uftadagi
ehsaan hai kya kya tera ae husn-e-beparva tera
do ashk jane kis liye palkon pe aa kar tik gaye
altaf ke barish teri ikram ka dariya tera
ae bedareg-o-beaman hum ne kabhi ke hai fugan
hum ko teri vahshat sahi hum ko sahi sauda tera
tu bevafa tu maharaban hum aur tujh se bad-guman
hum ne to pucha tha zara ye waqt q thahara tera
hum par ye sakhti ke nazar hum hain faqir-e-rahguzar
rasta kabhi roka tera daman kabhi thama tera
han han teri surat hasin lekin tu aisa bhi nahi
is shakhs ke ashar se shohara hua kya kya tera
beshak usi ka dosh hai kehta nahi khamosh hai
tu aap kar aisi dawa bimar ho acha tera
bedard sunani ho to chal kehta hai kya achi gazal
aashiq tera rusava tera shayar tera “insha” tera
Poet of the Poem / Ghazal or Nazam : Ibne Insha
Kaise sukun paun tujhe dekhane ke bad
ab kya gazal sunaun tujhe dekhane ke bad
aavaz de rahi hai meri zindagi mujhe
jaun main ya na jaun tujhe dekhane ke bad
kabe ka ehataram bhi meri nazar mein hai
sar kis taraf jhukaun tujhe dekhane ke bad
teri nigah-e-mast ne makhmur kar diya
kya maikade ko jaun tujhe dekhane ke bad
nazron mein tab-e-did hi baqi nahi rahi
kis se nazar milaun tujhe dekhane ke bad
Poet of the Poem / Ghazal or Nazam : Sayeed Shahidi
Lab pe tere iqrar-e-mohabbat sher gazal ka lagata hai
sharm se chehara lal gulabi phul kamal ka lagata hai
dil ko najar se takaraye bhi ek zamana bit gaya
chot magar hai itni taza hadasa kal ka lagata hai
bekhud ho kar mast havayen aise kab laharati thin
ye jadu to halka halka us aanchal ka lagata hai
hum samajhe the bhool gaye hain wo chahat ka afasana
aj magar phir dard sa dil mein halka halka lagata hai
Poet of the Poem / Ghazal or Nazam : Poet Unknown
Is naz is andaz se tum haye chalo ho
roz ek gazal hum se kahalavaye chalo ho
rakhna hai kaheen panv to rakho ho kaheen panv
chalana zara aaya hai to itaraye chalo ho
divan-e-gul qaidi-e-zanjir hai aur tum
kya thath se gulashan ke hawa khaye chalo ho
mein mein koi khami hai na sagar mein koi khot
pina nahi aaye hai to chalkaye chalo ho
hum kuch nahi kahate hain koi kuch nahi kehta
tum kya ho tumhin sab se kahalavaye chalo ho
zulfon ke to fitrat hai lekin mere pyare
zulfon se bhi zyada balkhaye chalo ho
wo shokh sitamgar to sitam dhaye chale hai
tum ho ke “kaleem” apni gazal gaye chalo ho
Poet of the Poem / Ghazal or Nazam : Kaleem Ajiz
Ik zara dil ke qarib aao to kuch chain pade
jam ko jam se takarao to kuch chain pade
baithe baithe to har mauj se dil dahalega
badake tufan se takarao to kuch chain pade
jee ulajhata hai nagma-e-rangin sun kar
geet ek dard bhara gao to kuch chain pade
daag ke sher javani mein bhale lagate hain
mir ke koi gazal gao to kuch chain pade
yad-e-ayan mein guzishtan se ijazat lekar
‘tarz’ kuch der ko so jao to kuch chain pade
Poet of the Poem / Ghazal or Nazam : Ganesh Bihari Tarz
