Rukh mein gard-e-malal thi kya thi
hasil-e-mah-o-sal thi kya thi
ek surat si yaad hai ab bhi
aap apni misal thi kya thi
mere janib uthi thi koi nigah
ek mubaham saval thi kya thi
us ko pakar bhi us ko pa na saka
justaju-e-jamal thi kya thi
dil mein thi par labon tak aa na saki
aarazu-e-visal thi kya thi
umr bhar mein bas ek bar aayi
sa’at-e-lazaval thi kya thi
koi khvahan na tha ki jins-e-hunar
ek muflis ka mal thi kya thi
Poet of the Poem / Ghazal or Nazam :Khalil ur Rahman Azmi
Tarz jine ka sikhati hai mujhe
tashnagi zeher pilati hai mujhe
raat bhar rahati hai kis baat ke dhun
na jagti hai na sulati hai mujhe
ruthata hun jo kabhi duniya se
zindagi aake manati hai mujhe
aaina dekhun to kyunkar dekhun
yaad ik shakhs ke aati hai mujhe
band karta hun jo aankhen kya kya
roshani si nazar aati hai mujhe
koi mil jaye to rasta kat jaye
apni parachai darati hai mujhe
ab to ye bhool gaya kis ke talab
des parades phirati hai mujhe
kaise ho khatm kahani gham ke
ab to kuch neend si aati hai mujhe
Poet of the Poem / Ghazal or Nazam : Khalil ur Rahman Azmi
jalta nahi aur jal raha hun
kis aag mein main pighal raha hun
mafaluj hain hath-panv mere
phir zahan mein q chal raha hun
rai ka bana ke ek parvat
ab is pe khud hi phisal raha hun
kis hath se hath main milaun
ab apne hi hath mal raha hun
kyon aaina bar bar dekhun
main aj nahi jo kal raha hun
ab kon sa dar raha hai baqi
us dar se kyon main nikal raha hun
qadmon ke tale to kuch nahi hai
kis cheez ko main kuchal raha hun
ab koi nahi raha sahara
main aj se phir sambhal raha hun
ye barf hatao mere sar se
main aj kuch aur jal raha hun
Poet of the Poem / Ghazal or Nazam : Khalil ur Rahman Azmi
Dil ke dil mein na rah jaye ye kahani kah lo
chahe do harf likho chahe zabani kah lo
main ne marane ke dua mangi wo puri na hui
bas is ko mere jine ke kahani kah lo
sarsar-e-vaqt uda le gai rudad-e-hayat
wohi avaraq jinhen ahad-e-javani kah lo
tum se kahane ke na thi bat magar kah baitha
ab ise meri tabiyat ke ravani kah lo
wohi ik qissa zamane ko mera yaad raha
wohi ik bat jise aj purani kah lo
hum pe jo guzri hai bas us ko raqam karte hain
aapbiti kaho ya marsiyakhvani kah lo
Poet of the Poem / Ghazal or Nazam : Khalil ur Rahman Azmi
