har ek ruh mein ek gham chupa lage hai mujhe
ye zindagi to koi bad-dua lage hai mujhe
jo aansu mein kabhi raat bhig jati hai
bahut qarib wo aavaz-e-pa lage hai mujhe
main so bhi jaun to meri band aankhon mein
tamam raat koi jhankata lage hai mujhe
main jab bhi us ke khayalon mein kho sa jata hun
wo khud bhi baat kare to bura lage hai mujhe
main sochata tha ki lautunga ajanabi ke tarah
ye mera gaon to pahachana sa lage hai mujhe
bikhar gaya hai kuch is tarah aadmi ka vajud
har ek fard koi saneha lage hai mujhe

Poet of the Poem / Ghazal or Nazam : Jan Nissar Akhtar

apni aag ko zinda rakhna kitana mushkil hai
pathar bich aaina rakhna kitana mushkil hai
kitana aasan hai tasvir banana auron ki
khud ko pas-e-aina rakhna kitana mushkil hai
tumane mandir dekhe honge ye mera aangan hai
ek diya bhi jalta rakhna kitana mushkil hai
chullu mein ho dard ka dariya dhyan mein usake honth
yun bhi khud ko pyasa rakhna kitana mushkil hai

Poet of the Poem / Ghazal or Nazam :  Ishrat Afreen

aankh se aankh milta hai koi
dil ko khinche liye jata hai koi
va-e-hairat ke bhari mahafil mein
mujh ko tanha nazar aata hai koi
chahiye khud pe yaqin-e-kamil
hausla kis ka badhata hai koi
sab karishmat-e-tasavvur hai “shakeel”
varana aata hai na jata hai koi

Poet of the Poem / Ghazal or Nazam : Shakeel Badayuni