Zahan pe chai hui gham ke ghata ho jaise
dard mein dubi hui sari fiza ho jaise
ab dil-e-zar kisi taur bahalata hi nahi
is ka paiman-e-vafa toot gaya ho jaise

pursish-e-gam ke bhi rasm utha di us ne
hal-e-dil sun ke wo sharminda hua ho jaise
ab to har sans ke aamad pe guman hota hai
zindagi ek fasurda sa diya ho jaise

Poet of the Poem / Ghazal or Nazam : Krishan Adeeb

Talkhi-e-may mein zara talkhi-e-dil bhi gholen
aur kuch der yahan baith ke pi lain ro lain
har taraf ek purasarar si khamoshi hai
apne saye se koi baat karen kuch bolen
koi to shakhs ho jee jan se chahen jis ko
koi to jan-e-tasavvur ho ke jis ke ho lain
aah ye dil ke kasak haye ye aankhon ke jalan
neend aa jaye agar aj to hum bhi so lain

Poet of the Poem /  Ghazal or Nazam: Krishan Adeeb

jab bhi aati hai teri yaad kabhi sham ke bad
aur bad jati hai afsurdadili sham ke bad
ab iradon pe bharosa hai na tauba pe yaqin
mujh ko le jaye kahan tashnalabi sham ke bad
yun to har lamha teri yaad ka bojhal guzra
dil ko mahasus hui teri kami sham ke bad
yun to kuch sham se pahale bhi udasi thi ‘adeeb’
ab to kuch aur badi dil ke lagi sham ke bad

Poet of the Poem / Ghazal or Nazam :Krishan Adeeb