Wo gulfarosh kahan ab gulab kis se lun
nahi raha mera saqi sharab kis se lun
teri talash mein is umr-e-mustu’ar ke saal
jo rayegan gaye un ka hisab kis se lun
hayat khud hai saval aur khud javab apna
saval kis se karun main javab kis se lun
kisi ke naam jo mansub abhi nahi ke thi
main apni khoi hui wo kitab kis se lun
tumhare bad na dekhun tumhare jaison ko
to ye shabin ye umangen ye khwab kis se lun
nashakashi se bi le lun ‘shaoor’ aj magar
wo roz-e-abr-o-shab-e-mahatab kis se lun

Poet of the Poem / Ghazal or Nazam : Anwar Shaoor

Ishq mein lajavab hain hum log
mahatab aafatab hain hum log
garche ahal-e-sharab hain hum log
ye na samajho kharab hain hum log
sham se aa gaye jo pine par
subah tak aafatab hain hum log
naz karati hai khana-virani
aise khana-kharab hain hum log
tu hamara javab hai tanaha
aur tera javab hain hum log
khub hum janate hain qadr apni
kitne nakamayab hain hum log
har haqiqat se jo guzar jayen
wo sadaqat-m’ab hain hum log
jab mili aankh hosh kho baithe
kitne hazir-javab hain hum log

Poet of the Poem / Ghazal or Nazam : Jigar Moradabadi

Dil ke dariya ko kisi roz utar jana hai
itna besimt na chal laut ke ghar jana hai
us tak aati hai to har cheez thahar jati hai
jaise pana hi use asl mein mar jana hai
bol ae sham-e-safar rang-e-rihai kya hai
dil ko rukana hai ki taron mein thahar jana hai
kon ubharate hue mahatab ka rasta roke
us ko har taur su-e-dasht-e-sahar jana hai
main khila hun to isi khak mein milana hai mujhe
wo to khushbu hai use agale nagar jana hai
wo tere husn ka jadu ho ke mera gam-e-dil
har musafir ko isi ghat utar jana hai

Poet of the Poem / Ghazal or Nazam : Amjad Islam Amjad