aankhon mein jee mera hai idhar yar dekhana
aashiq ka apne aakhari didar dekhana
kaisa chaman ke hum se asiron ko mana hai
chak-e-qafas se bag ke divar dekhana
aankhen churaio na tuk abr-e-bahar se
meri taraf bhi didah-e-khunbar dekhana
ae ham-safar na aable ko pahunche chashm-e-tar
laga hai mere paon mein aa khar dekhana
hona na char chashm dik uss zulm-paishah se
hoshiyar zinhar khabardar dekhana
sayyad dil hai dag-e-judai se rashk-e-bag
tujh ko bhi ho nasib ye gulazar dekhana
gar zamzama yahi hai koi din to ham-safir
is fasl hi mein hum ko giriftar dekhana
bul-bul hamare gul pe na gustakh kar nazar
ho jayega gale ka kaheen har dekhana
shayad hamari khak se kuch ho bhi ae nasim
girbal kar ke kucha-e-dildar dekhana
us khush-nigah ke ishq se parahez kijio ‘meer’
jata hai leke jee hi ye aazar dekhana
Poet of the Poem / Ghazal or Nazam : Meer Taqi Meer
Ba-rang-e-bu-e-gul, is bag ke hum aashna hote
ki ham-rah-e-saba tuk sair karate, aur hawa hote
sarapa aarazu hone ne banda kar diya hamako
vagarana hum khuda the, gar dil-e-bemuddaa hote
falak, ae kash! hamako khak hi rakhata, ki us mein hum
gubar-e-rah hote ya kisi ke khak-e-pa hote
ilahi kaise hote hain jinhen hai bandagi khvahish
hamen to sharm daman-gar hoti hai, khuda hote
kahen jo kuch malamatagar, baja hai ‘meer’ kya jane
unhen malum tab hota, ki vaise se juda hote
Poet of the Poem / Ghazal or Nazam : Meer Taqi Meer
Bat kya aadmi ke ban aai
aasman se zamin napavai
charakh zan usake vaste hai madam
ho gaya din tamam rat aai
mah-o-khurshid-o-bad sabhi
usaki khatir hue hain saudai
kaise kaise kiye taraddad jab
rang rang usako cheez pahunchai
usako tarajah sab ke upar de
lutf-e-haq ne ke izzat afazai
hairat aati hai usaki baten dekh
khud sari khud satai khud rai
shukr ke sajdon mein ye vajib tha
ye bhi karta sajda jabin sai
so to usaki tabiyat-e-sarkash
sar na lai faro ke tuk lai
‘meer’ na cheez musht-e-khak ALLAH
un ne ye kibariya kahan pai
Poet of the Poem / Ghazal or Nazam : Meer Taqi Meer
Barha gor dil jhuka laya
ab ke shart-e-wafa baja laya
qadar rakhati na thi mita-e-dil
sare aalam ko main dikha laya
dil ke yak qatara-e-khun nahi hai besh
ek aalam ke sar bala laya
sab pe jis bar ne girani ke
usako ye natavan utha laya
dil mujhe us gali mein le ja kar
aur bhi khak mein mila laya
ab to jate hain butakade ae ‘meer’
phir milenge agar khuda laya
Poet of the Poem / Ghazal or Nazam : Meer Taqi Meer
aa jayen hum nazar jo koi dam bahut hai yan
mohalat basan-e-barq-o-sharar kam bahut hai yan
yak lahaza sina kobi se furasat hamen nahi
yani ki dil ke jane ka matam bahut hai yan
hum raharavan-e-rah-e-fana der rah chuke
vaqfa basan-e-subh koi dam bahut hai yan
hasil hai kya sivaye tarai ke dahar mai
uth aasman tale se ke shabanam bahut hai yan
is butakade mai mani ka kis se karen saval
aadam nahi surat-e-adam bahur hai yan
ajaz-e-isavi se nahi bahas ishq mai
teri hi bat jan-e-mujassim bahut hai yan
mere hilak karane ka gam hai abas tumhen
tum shad zindagani karo gam bahut hai yan
shayad ke kam subh tak apana khinche na ‘meer’
ahaval aj sham se daraham bahut hai yan
Poet of the Poem / Ghazal or Nazam : Meer Taqi Meer
