Posts tagged: Muqaddar

Ye ab khula hai ki koi bhi manzar mera na tha – Iftikhar Arif

Ye ab khula hai ki koi bhi manzar mera na tha
main jis mein reh raha tha wohi ghar mera na tha
main jis ko ek umr sambhale phira kiya
matti bata rahi wo paikar mera na tha
mauj-e-hava-e-shahar-e-muqaddar javab de
dariya mere na the ki samandar mera na tha
phir bhi to sangsar kiya ja raha hun main
kahate hain naam tak sar-e-mahazar mera na tha
sab log apne apne qabilon ke sath the
ek main hi tha ki koi bhi lashkar mera na tha

Poet of the Poem / Ghazal or Nazam : Iftikhar Arif

Tumhare bulane ko jee chahata hai – Behzad Lucknawi

Tumhare bulane ko jee chahata hai
muqaddar banane ko jee chahata hai
jo tum aao to sath khushiyan bhi aayen
mera muskurane ko jee chahata hai
tumhari muhabbat mein khoyi hui hun
tumhen ye sunane ko jee chahata hai
ye jee chahata hai ki tumhari bhi sun lun
khud apni sunane ko jee chahata hai

Poet of the Poem / Ghazal or Nazam : Behzad Lucknawi

Peshaniyon pe likhe muqaddar nahi mile – Rahat Indori

Peshaniyon pe likhe muqaddar nahi mile
dastar kahan milenge jahan sar nahi mile
aavaragi ko dubate suraj se rabt hai
magrib ke bad hum bhi to ghar par nahi mile
kal aainon ka jashn hua tha tamam raat
andhe tamashbinon ko pathar nahi mile
main chahata tha khud se mulaqat ho magar
aaine mere qad ke barabar nahi mile
pardes ja rahe ho to sab dekhte chalo
mumkin hai vapas aao to ye ghar nahi mile

Poet of the Poem / Ghazal or Nazam : Rahat Indori

un se hamen kuch kam nahi hai -Sheri Bhopali

un se hamen kuch kam nahi hai
dil ko magar aaram nahi hai
meri tabahi mera muqaddar
aap pe kuch ilzam nahi hai
ishq hai aisa aalam jis mein
subah nahi hai sham nahi hai
husn ke jalve mangane valo
ishq ke daulat aam nahi hai
hum ko na apna kah ke pukaro
ye to hamara naam nahi hai
itna bhi kya “sheri” se takalluf
aisa to wo badanam nahi hai

Poet of  the Poems / Ghazal or Nazam :Sheri Bhopali

Na jee bhar ke dekha na kuch baat ke – Bashir Badr

Na jee bhar ke dekha na kuch baat ke
badi aarzoo thi mulaqat ke
kai saal se kuch khabar hi nahi
kahan din guzra kahan raat ke
ujalon ke pariyan nahane lagin
nadi gunagunai khayalat ke
main chup tha to chalati hawa ruk gai
zuban sab samajhate hain jazbat ke
sitaron ko shayad kahbar hi nahi
musafir ne jane kahan raat ke
muqaddar mere chashm-e-pura’ab ka
barasati hui raat barsat ke

Poet of the Poem / Ghazal or Nazam : Bashir Badr

Mere khwabon ke jharokon ko sajane wali – Sahir Ludhianvi

mere khwabon ke jharokon ko sajane wali
tere khwabon mein kaheen mera guzar hai ki nahi
puchakar apni nigahon se batade mujhko
meri raton ke muqaddar mein sahar hai ke nahi
char din ke ye rafaqat jo rafaqat bhi nahi
umr bhar ke liye aazar hui jati hai
zindagi yun to hamesha se pareshan-si thi
ab to har sans giranbar hui jati hai
meri ujadi hui nindon ke shabistanon mein
tu kisi khwab ke paikar ke tarah aai hai
kabhi apni si kabhi gair nazar aati hai
kabhi ikhalas ke murat kabhi harajai hai
pyar par bas to nahi haimera lekin phir bhi
tu bata de ki tujhe pyar karun ya na karun
tune khud apne tabassum se jagaya hai jinhen
un tamannaon ka izahar karun ya na karun
tu kisi aur ke daman ke kali hai lekin
meri raten teri khushbu se basi rahati hain
tu kaheen bhi ho tere phul se aariz ke qasam
teri palaken meri aankhon pe jhuki rahati hain
tere hathon ke hararat tere sanson ke mahak
tairati rahati hai ehasas ke pahanai mein
dhundhati rahati hain takhail ke banhen tujh ko
sard raton ke sulagati hui tanahai mein
tera altaf-o-karam ek haqiqat hai magar
ye haqiqat bhi haqiqat mein fasana hi na ho
teri manus nigahon ka ye mohatat payam
dil ke khoon karne ka ek aur bahana hi na ho
kon jane meri imroz ka farda kya hai
qurbaten bad ke pasheman bhi ho jati hai
dil ke daman se lipatati hui rangin nazaren
dekhte dekhte anjan bhi ho jati hai
meri daramanda javani ke tamannaon ke
muzmahil khwab ke tabir bata de mujhko
tere daman mein gulistan bhi hai, virane bhi
mera hasil meri taqdir bata de mujhko

Poet of the Poem / Ghazal or Nazam :Sahir Ludhianvi

Kabhi saya hai kabhi dhup muqaddar mera – Athar Nafees

Kabhi saya hai kabhi dhup muqaddar mera
hota rehta hai yun hi qarz barabar mera
toot jate hain kabhi mere kinare mujh mein
dub jata hai kabhi mujh mein samandar mera
kisi sahara mein bichad jayenge sab yar mere
kisi jangal mein bhatak jayega lashkar mera
bavafa tha to mujhe puchane wale bhi na the
bevafa hun to hua naam bhi ghar ghar mera
kitne hanste hue mausam abhi aate lekin
ek hi dhup ne kumhala diya manzar mera
aakhiri jur’a-e-purkaif ho shayad baqi
ab jo chalaka to chalak jayega sagar mera

Poet of the Poem / Ghazal or Nazam : Athar Nafees








Muqaddar, poems and Ghazals


Muqaddar shayari sms in Urdu for your friends. Muqaddar poetry , ghazal , poem and sher o shayr in Hindi. Best 1 line , 2 line and 4 line Muqaddar shayari Collection Online.