Wo hamen jis qadar aazamate rahe
apni hi mushkilon ko badate rahe
wo akele mein bhi jo lagate rahe
ho na ho un ko hum yaad aate rahe
yaad karne par bhi dost aaye na yaad
doston ke karam yaad aate rahe
aankhen sukhi hui nadiyan ban gain
aur tufan badsatur aate rahe
pyar se un ka inkar bar-haq magar
lab ye q der tak thar-tharate rahe
thin to kamanen hathon mein agyar ke
tir magar apanon ke janib se aate rahe
kar liya sab ne hum se kinara magar
ek naseh garib aate jate rahe
maikade se nikal kar janab-e-’khumar’
qaba-o-dair mein khak udate rahe

Poet of the Poem / Ghazal or Nazam : Khumar Barabankvi

Wo gazal valon ka uslub samajhate honge
chand kahate hain kise khub samajhate honge
itni milati hai meri ghazlon se surat teri
log tujh ko mera mahbub samajhate honge
main samajhata tha muhabbat ke zaban khushbu hai
phul se log ise khub samajhate honge
bhool kar apna zamana ye zamane wale
aj ke pyar ko mayub samajhate honge

Poet of the Poem / Ghazal or Nazam : Bashir Badr

Ye chirag benazar hai ye sitara bezuban hai
abhi tujhase milta julata koi dusara kahan hai
wohi shakhs jisape apne dil-o-jan nisar kar dun
wo agar khafa nahi hai to zarur badaguman hai
kabhi pa ke tujh ko khona kabhi kho ke tujh ko pana
ye janam janam ka rishta tere mere daramiyan hai
mere sath chalanevale tujhe kya mila safar mein
wohi dukh bhari zamin hai wohi gham ka aasman hai
main isi guman mein barason bada mutmain raha hun
tera jism betagaiyyur hai mera pyar javidan hai
unhin raston ne jin par kabhi tum the sath mere
mujhe rok rok pucha tera hamasafar kahan hai

Poet of the Poem / Ghazal or Nazam :Bashir Badr

Wo dil hi kya tere milane ke jo dua na kare
main tujh ko bhool ke zinda rahun khuda na kare
rahega sath tera pyar zindagi banakar
ye aur baat meri zindagi wafa na kare
ye thik hai nahi marata koi judai mein
khuda kisi se kisi ko magar juda na kare
suna hai usako mohabbat duayen deti hai
jo dil pe chot to khaye magar gila na kare
zamana dekh chuka hai parakh chuka hai use
“qateel” jan se jaye par iltaja na kare

Poet of the Poem / Ghazal or Nazam : Qateel Shifai

Tu mujhe itane pyar se mat dekh
teri palkon ne narm saye mein
dhup bhi chandani si lagti hai
aur mujhe kitni dur jana hai
ret hai garm, panv ke chale
yun damakate hain jaise angare
pyar ke ye nazar rahe, na rahe
kon dasht-e-vafa mein jata hai
tere dil ko khabar rahe na rahe
tu mujhe itane pyar se mat dekh

Poet of the Poem / Ghazal or Nazam : Ali Sardar Jafri

Tu kisi aur ke jagir hai ae jan-e-gazal
log tufan utha denge mere sath na chal
pahalehaq tha teri chahat ke chaman par mera
pahale haq tha teri khushbu-e-badan par mera
ab mera pyar tere pyar ka haqdar nahi
main tere gesu-o-rukhsar ka haqdar nahi
ab kisi aur ke shanon pe hai tera aanchal
main tere pyar se ghar apna basaun kaise
main teri mang sitaron se sajaun kaise
meri qismat mein nahi pyar ke khushbu shayad
mere hathon ke lakiron mein nahi tu shayad
apni taqdir bana mera muqaddar na badal
mujh se kahati hain ye khamosh nigahen teri
meri paravaz se unchi hain panahen teri
aur gairat-e-ehasas pe sharminda hun
ab kisi aur ke bahon mein hain bahen teri
ab kahan mera thikana hai kahan tera mahal

Poet of the Poem / Ghazal or Nazam : Zafar Kaleem

Tu bhi kisi ka pyar na paye khuda kare
tujh ko tera nasib rulaye khuda kare
raton mein tujh ko neend na aaye khuda kare
tu dar-ba-dar ke thokaren khaye khuda kare
aaye bahar tere gulistan mein bar bar
tujh par kabhi nikhar na aaye khuda kare
meri tarah tujhe bhi javani mein gham mile
tera na koi sath nibhaye khuda kare
manzil kabhi bhi pyar ke tujh ko na mil sake
tu bhi dua ko hath uthaye khuda kare
tujh par shab-e-visal ke raten haram hon
shammen jala jala ke bujhaye khuda kare
ho jayen bad-duayen meri dosto galat
ab un pe koi harf na aaye khuda kare

Poet of the Poem / Ghazal or Nazam : Hafeez Jullundhary

Tumhare shahar ka mausam bada suhana lage
main ek sham chura lun agar bura na lage
tumhare bas mein agar ho to bhool jao hamen
tumhen bhulane mein shayad mujhe zamana lage
hamare pyar se jalne lagi hai ye duniya
dua karo kisi dushman ki baddua na lage
na jane kya hai us ke bebak aankhon mein
wo muh chupa ke jaye bhi to bevafa lage
jo dubana hai to itane sukun se dubo
ke aas pas ke laharon ko bhi pata na lage
ho jis ada se mere sath bevafai kar
ke tere bad mujhe koi bevafa na lage
wo phul jo mere daman se ho gaye mansub
khuda kare unhen bazar ke hawa na lage
tum aankh mund ke pi jao zindagi ‘qaiser’
ke ek ghunt mein shayad ye badmaza na lage

Poet of the Poem / Ghazal or Nazam : Qaiser ul Jafri