Taman umr azabon ka silasila to raha
ye kam nahi hamen jine ka hausla to raha
guzar hi aaye kisi tarah tere divane
qadam qadam pe koi sakht marhala to raha
chalo na ishq hi jeeta na aql har saki
tamam waqt maze ka muqabala to raha
main teri zat mein gum ho saka na tu mujh mein
bahut qarib the hum phir bhi fasala to raha
ye aur baat ki har ched laubali thi
teri nazar ka dilon se muamala to raha
bahut hasin sahi wazae-ehatiyat teri
meri havas ko tere pyar se gila to raha
Poet of the Poem / Ghazal or Nazam: Jan Nissar Akhtar
mujhe dil ke khata par ‘yas’ sharmana nahi aata
paraya jurm apne naam likhavana nahi aata
bura ho pa-e-sarkash ka ki thak jana nahi aata
kabhi gumrah ho kar reh par aana nahi aata
mujhe ae nakhuda aakhir kisi ko muh dikhana hai
bahana kar ke tanha par utar jana nahi aata
musibat ka pahad aakhir kisi din kat hi jayega
mujhe sar mar kar teshe se mar jana nahi aata
asiro shauq-e-azadi mujhe bhi gudgudata hai
magar chadar se bahar panv phailana nahi aata
dil-e-behausala hai ik zara si tis ka mehman
wo aansu kya piyega jis ko gham khana nahi aata
Poet of the Poem / Ghazal or Nazam :Yagna Yaas Changezi
mujhko yaqin hai sach kahati thin jo bhi ammi kahati thin
jab mere bachpan ke din the chand mein pariyan rahati thin
ik ye din jab apanon ne bhi hum se rishta tod liya
ik wo din din jab ped ke shakhe,n bojh hamara sahati thin
ik ye din jab lakhon gham aur kal pada hai aansu ka
ik wo din jab ek zara si baat pe nadiyan bahati thin
ik ye din jab sari sadaken ruthi ruthi lagti hain
ik wo din jab ‘ao khelen’ sari galiyan kahati thin
ik ye din jab jagi raten deewaron ko takati hain
ik wo din jab shakhon ke bhi palaken bojhal rahati thin
ik ye din jab zahan mein sari ayyari ke baten hain
ik wo din jab dil mein sari bholi baten rahati thin
ik ye ghar jis ghar mein mera saz-o-saman rehta hai
ik wo ghar jisamen meri budhi nani rahati thin
Poet of the Poem / Ghazal or Nazam :Javed Akhtar
meri zindagi hai zalim, tere gham se aashkara
tera gham hai dar-haqiqat mujhe zindagi se pyara
wo agar bura na mane to jahan-e-rang-o-bu mein
main sukun-e-dil ke khatir koi dhundh lun sahara
ye fulak fulak havayen ye jhuki jhuki ghatayen
wo nazar bhi kya nazar hai jo samajh na le ishara
mujhe aa gaya yaqin sa yahi hai meri manzil
sar-e-rah jab kisi ne mujhe daffa’atan pukara
main bataun farq nasih, jo hai mujh mein aur tujh mein
meri zindagi talatum, teri zindagi kinara
mujhe guftagu se bad kar gam-e-izn-e-guftagu hai
wahi baat puchte hain jo na kah sakun dobara
koi aye ‘shakeel’ dekhe, ye junun nahi to kya hai
ke usi ke ho gaye hum jo na ho saka hamara
Poet of the Poem / Ghazal or Nazam : Shakeel Badayuni
main to aawara shayar hun meri kya vaqa’at
ek do geet pareshan se ga leta hun
gahe gahe kisi nakam sharabi ke tarah
ek do zeher ke sagar bhi chadha leta hun
tu ke ik vadi-e-gulrang ke shahzadi hai
ek bekar se insan ke liye vaqf na ho
tere khwabon ke jaziron mein badi raunaq hai
ek anjan se tufan ke liye vaqf na ho
Poet of the Poem / Ghazal or Nazam :Ahmed Faraz
Main roya parades mein bhiga man ka pyar
dukh ne dukh se baat ke bin chiththi bin tar
chota karake dekhiye jivan ka vistar
aankhon bhar aakash hai bahon bhar sansar
leke tan ke nap ko ghume basti ganv
har chadar ke gher se bahar nikle panv
sabaki puja ek si alag-alag har rit
masjid jaye maulvi koyal gaye geet
puja ghar mein murti mira ke sang shyam
jisaki jitani chakari utane usake dam
saton din bhagavan ke kya mangal kya pir
jis din soe der tak bhuka rahe fakir
achi sangat baithakar sangi badle rup
jaise milakar aam se mithi ho gai dhup
sapana jharna neend ka jagi aankhen pyas
pana khona khojana sanson ka itihas
chahe gita vachiye ya padhiye quran
mera tera pyar hi har pustak ka gyan
Poet of the Poem / Ghazal or Nazam :Nida Fazli
man mausam ka kaha, chai ghata, jam utha
aag se aag bujha, phul khila, jam utha
pi mere yar tujhe apni qasam deta hun
bhool ja shikava-gila, hath mila, jam utha
hath mein jam jahan aaya muqaddar chamaka
sab badal jayega qismat ka likha jam utha
ek pal bhi kabhi ho jata hai sadiyon jaisa
der kya karana yahan, hath bada, jam utha
pyar hi pyar hai sab log barabar hain yahan
maikade mein koi chota na bada, jam utha
Poet of the Poem / Ghazal or Nazam :Bashir Badr
man sunao mujhe wo kahani
jis mein raja na ho na ho rani
jo hamari tumhari katha ho
jo sabhi ke hriday ke gatha ho
gandh jis mein ho apni dhara ke
baat jis mein ho apasara ke
ho na pariyan jahan aasamani
wo kahani jo hansana sikha de
pet ke bhukh ko bhi mita de
jis mein sach ke bhari chandani ho
jis mein umeed ke roshani ho
jis mein na ho kahani purani
Poet of the Poem / Ghazal or Nazam :Nandlal Pathak
