rachi hai ratjago ke chandani jin ke jabinon mein
‘qateel’ ek umr guzri hai hamari un hasinon mein
wo jin ke aanchalon se zindagi takhalik hoti hai
dhadakata hai hamara dil abhi tak un hasinon mein
zamana parasai ke hadon se hum ko le aaya
magar hum aj tak rusva hain apne hamnashinon mein
talash un ko hamari to nahi puch zara un se
wo qatil jo liye phirate hain khanjar aastinon mein
Poet of The Poem / Ghazal or Nazam :Qateel Shifai
jo bhi guncha tere hothon par khila karta hai
wo meri tangi-e-daman ka gila karta hai
der se aj mera sar hai tere zanon par
ye wo rutba hai jo shahon ko mila karta hai
main to baitha hun dabaye huye tufanon ko
tu mere dil ke dhadakane ka gila karta hai
raat yon chand ko dekha hai nadi mein raksan
jaise jhumar tere mathe pe hila karta hai
kon kafir tujhe ilzam-e-tagaful dega
jo bhi karta hai muhabbat ka gila karta hai
Poet of the Poem / Ghazal or Nazam :Qateel Shifai
Ik-ik pathar jod ke main ne jo divar banai hai
jhankhu us ke piche to ruswai hi ruswai hai
yon lagata hai sote jagate auron ka mohataj hun main
aankhen meri apni hain par un mein neend parai hai
dekh rahe hain sab hairat se nile-nile pani ko
puche kon samandar se tujh mein kitni gaharai hai
sab kahate hain ik jannat
utari hai meri dharati par
main dil mein sochun shayad kamzor meri binai hai
bahar sahan mein pedon par kuch jalate bujhate jugnu the
hairat hai phir ghar ke andar
kis ne aag lagai hai
aj hua malum mujhe is shahar ke chand sayanon se
apni rah badalate rahana sabase badi danai hai
tod gaye paiman-e-vafa is daur mein kaise kaise log
ye mat soch ‘qateel’ ki bas ik yar tera harajai hai
Poet of the Poem / Ghazal or Nazam : Qateel Shifai
guzri dinon ke yaad barasati ghata lage
guzarun jo us gali se to thandi hawa lage
mehaman banke aaye kisi roz agar wo shakhs
us roz bin sajaye mera ghar saja lage
main is liye manata nahi vasl ke khushi
mere raqib ke na mujhe baddua lage
wo qahat dosti ka pada hai ki in dinon
jo muskura ke baat kare aashna lage
tark-e-vafa ke bad ye us ke ada ‘qateel’
mujhko sataye koi to us ko bura lage
Poet of the poem/ghazal or Nazam: Qateel Shifai
Duniya ne hum pe jab koi ilzam rakh diya
hum ne muqabil us ke tera naam rakh diya
ik khas had pe aa gai jab teri berukhi
naam us ka hum ne gardish-e-ayyam rakh diya
main ladkhada raha hun tujhe dekh-dekh kar
tune to mere samane ik jam rakh diya
kitna sitamzarif hai wo sahib-e-jamal
us ne diya jala ke lab-e-bam rakh diya
insan aur dekhe bagair us ko man le
ik khauf ka bashar ne khuda naam rakh diya
ab jis ke jee mein aaye wohi paye roshni
hum ne to dil jala ke sar-e-am rakh diya
kya masalahatshanas tha wo aadmi ‘qateel’
majaburiyon ka jis ne wafa naam rakh diya
Poet of the Poem / Ghazal or Nazam : Qateel Shifai
hijr ke shab hai aur ujala hai
kya tasavvur bhi lutane vala hai
gham to hai ain zindagi lekin
gamgusaron ne mar dala hai
ishq majabur-o-namurad sahi
phir bhi zalim ka bolbala hai
dekh kar barq ke pareshani
aashiyan khud hi phunk dala hai
kitne ashkon ko kitni aahon ko
ik tabassum mein us ne dhala hai
teri baton ko main ne ae waiz
ahatarama hansi mein tala hai
maut aaye to din phire shayad
zindagi ne to mar dala hai
sher nazmen shaguftagi masti
gham ka jo rup hai nirala hai
lagzishen muskurai hain kya kya
hosh ne jab mujhe sambhala hai
dam andhere mein ghut raha hai khumar
aur charon taraf ujala hai
Poet of the Poem / Ghazal or Nazam : Qateel Shifai
hijr ke pahali sham ke saye dur ufaq tak chaye the
hum jab us ke shahar se nikle sab raste sanvalaye the
jane wo kya soch raha tha apne dil mein sari raat
pyar ke baten karte karte us ke nain bhar aaye the
mere andar chali thi aandhi thik usi din patajhad ke
jis din apne jude mein usane kuch phul sajaye the
usane kitne pyar se apana kufr diya nazarane mein
hum apne iman ka sauda jis se karne aaye the
kaise jati mere badan se bite lamhon ke khushbu
khwabon ke us basti mein kuch phul mere ham-saye the
kaisa pyara manzar tha jab dekh ke apne sathi ko
ped pe baithi ik chidiya ne apne par phailaye the
rukhsat ke din bhigi aankhon us ka wo kahana hae “qateel”
tum ko laut hi jana tha to is nagari q aaye the
Poet of the Poem / Ghazal or Nazam : Qateel Shifai
har bezaban ko sholanava kah liya karo
yaro sukut hi ko sada kah liya karo
khud ko fareb do ki na ho talkh zindagi
har sangdil ko jane-e-vafa kah liya karo
gar chahate ho khush rahen kuch bandagan-e-khas
jitne sanam hain un ko khuda kah liya karo
insan ka agar qad-o-qamat na badh sake
tum is ko nuqs-e-ab-o-hava kah liya karo
apne liye ab ek hi rah-e-nijat hai
har zulm ko raza-e-khuda kah liya karo
le de ke ab yahi hai nishan-e-ziya “qateel”
jab dil jale to us ko diya kah liya karo
Poet of the Poem / Ghazal or Nazam : Qateel Shifai
