Tumane suli pe latake jise dekha hoga
waqt aayega wohi shakhs masiha hoga
khwab dekha ya ki sahara mein basera hoga
kya khabar thi ki yahi khwab to saya hoga
main fizaon mein bikhar jaunga khushbu ban kar
rang hoga na badan hoga na chehara hoga

Poet of the Poem / Ghazal or Nazam : Sahir Hoshiarpuri

Kon kehta hai mohabbat ke zuban hoti hai
ye haqiqat to nigahon se bayan hoti hai
wo na aaye to satati hai khalish si dil ko
wo jo aaye to khalish aur jawan hoti hai
ruh ko shad kare dil ko jo puranur kare
har nazare mein ye tanvir kahan hoti hai
zabt-e-sailab-e-mohabbat ko kahan tak roke
dil mein jo baat ho aankhon se ayan hoti hai
zindagi ek sulagati si chita hai “sahir”
shola banti hai na ye bhuj ke dhuan hoti hai

Poet of the Poem / Ghazal or Nazam : Sahir Hoshiarpuri

Ishq kya cheez hai ye puchiye paravane se
zindagi jis ko mayassar hui jal jane se
maut ka khauf ho kya ishq ke divane ko
maut khud kanpati hai ishq ke divane se
ho gaya dher waheen aah bhi nikali na koi
jane kya baat kahi shama ne paravane se
husn be-ishq kaheen rah nahi sakata zinda
bujh gai shama bhi paravane ke jal jane se
khaye jati hai nadamat mujhe is gafalat ke
hosh mein aa ke chala aaya hun mayakhane se
kar diya gardish-e-ayyam ne rusva “sahir”
mujh ko shikwa hai yagane se na begane se

Poet of the Poem / Ghazal or Nazam : Sahir Hoshiarpuri