rah-e-ashiqi ke mare rah-e-am tak na pahunche
kabhi subah tak na pahunche kabhi sham tak na pahunche
mujhe mast agar bana de ye nigah-e-mast teri
mera hath kya nazar bhi kabhi jam tak na pahunche
mujhe apni bekasi ka nahi gham khayal ye hai
kaheen baat badhate badhate tere naam tak na pahunche
jo ye daur bevafa hai tera gham to mustaqil ho
wo hayat-e-ashiqi kya jo davam tak na pahunche
ye anokhi barhami hai ke na bhule se labon par
basabil-e-tazaqira bhi mere naam tak na pahunche
kaheen is tarah bhi ruthe na kisi se koi ‘yahya’
ke payam tak na aaye ke salam tak na pahunche
Poet of The Poem / Ghazal or Nazam :Yahya Jasdanwalla
jahan ban ban ke aas dil ke tuti jati hai
waheen qismat khadi becharagi pe muskurati hai
gam-e-ulfat ke hathon jo mita be-asara ho kar
usi pamal-e-gam ko haye ab duniya satati hai
kahan rehta hai qabu phir dil-e-nakam par mujh ko
ke jab rah rah ke tanahai mein teri yaad aati hai
hava-e-gam ka muntazar hun vafur-e-shauq mein ‘yahya’
magar ab dekhiye un ke tajalli kya dikhati hai
Poet of the Poem / Ghazal or Nazam :Yahya Jasdanwalla
jan-e-sukun aa bhi ja tera hi intazar hai
aankhon se ashk hai ravan jan bhi beqarar hai
hone ko fasl-e-gul bhi hai davat-e-aish hai magar
apni bahar ka mujhe aj bhi intazar hai
sare sahare ishq ke toot chuke hain hijr mein
ek tumhari yaad bas dard ke gam-gusar hai
ahad-e-vafa ka aap ke lutf-o-karam ka aap ke
aur kisi ko ho na ho mujh ko aitabar hai
lut gai gham ke aabaru lut chuki dil ke aarzoo
‘yahya’ nigah-e-lutf ka phir bhi ummidvar hai
Poet of the Poem / Ghazal or Nazam : Yahya Jasdanwalla
Dil ke lagi ko aur wo bhadaka rahe hain aj
sar ta pa bahar bane ja rahe hain aj
jaise ke ho raha hai tulu aaftab-e-naz
kuch aisi shan se wo chale aa rahe hain aj
thukra ke iltaja ko pa-e-gurur se
armanon ka wo khoon kiye ja rahe hain aj
wo pyar ke fizayen wo rangin sohabaten
manzar wo sare shauq ke yaad aa rahe hain aj
“yahya” gila karen bhi to kis bat ka karen
apne kiye ke aap saza pa rahe hain aj
Poet of the Poem / Ghazal or Nazam : Yahya Jasdanwalla
ek bekasi hai hijr ki maron ki sath sath
tuta hai mera dil bhi saharon ki sath sath
jee bhar ki dekhane bhi na paye the chup gaye
arman bhi hain udas nazaron ki sath sath
dil mein vafur-e-shauq ka tufan liye huye
khamosh jagata hun sitaron ki sath sath
itani to mahviyat ho tasavvur mein tere dost
khud ko bhi bhool jaun nazaron ki sath sath
“yahya” ye aag ishq ki phir bhi na bujh saki
hai dil mein ashk-e-gam bhi shararon ki sath sath
Poet of the poem/ghazal or Nazam: Yahya Jasdanwalla
