Ye dil kabhi na muhabbat mein kamayab hua
mujhe kharab kiya, aap bhi kharab hua
ajal men, zist mein turabat men, hashr mein zalim
tere sitam ke liye main hi intakhab hua
nigah-e-mast ko saqi ke kon de ilzam
mera nasib ki rusava mera shabab hua
hamare ishq ke das-bis ne bhi dad na di
kisi ka husn zamane mein intakhab hua
fana ka dawa hazaron ko tha zamane mein
habab ne mujhe dekha to aab-ab hua
Poet of the Poem / Ghazal or Nazam :Bekhud Dehlvi
Tu pas bhi ho to dil beqarar apna hai
ke hum ko tera nahi intazar apna hai
mile koi bhi tera zikr ched dete hain
ke jaise sara jahan razdar apna hai
wo dur ho to baja tark-e-dosti ka khayal
wo samane ho to kab ikhtiyar apna hai
zamane bhar ke dukhon ko laga liya dil se
is aasre pe ke ik gamgusar apna hai
‘faraz’ rahat-e-jan bhi wohi hai kya kije
wo jis ke hath se sinafigar apna hai
Poet of the Poem / Ghazal or Nazam : Ahmed Faraz
Tu kaheen bhi rahe sar pe tere ilzam to hai
tere hathon ke lakiron mein mera naam to hai
mujhko tu apna bana ya na bana teri khushi
tu zamane mein mere naam se badanam to hai
mere hisse mein koi jam na aaya na sahi
teri mahafil mein mere naam koi sham to hai
dekh kar log mujhe naam tera lete hain
is pe main khush hun muhabbat ka ye anjam to hai
wo sitamagar hi sahi dekh ke usako “sabir”
shukr is dil-e-bimar ko aaram to hai
Poet of the Poem / Ghazal or Nazam : Sabir Jalalabadi
Tu hai gar mujh se khafa khud se khafa hun main bhi
mujh ko pehchan ki teri hi ada hun main bhi
ek tujh se hi nahi fasl-e-tamanna shadab
wohi mausam hun wohi aab-o-hava hun main bhi
sabt hun dast-e-khamoshi pe hina ke surat
nashunida hi sahi tera kaha hun main bhi
chand ban kar tere aangan mein utar hi jaun
raat ke pichale pahar mangi dua hun main bhi
yun na murjha ki mujhe khud pe bharosa na rahe
pichale mausam mein tere sath khila hun main bhi
jane kis reh chalun kon se rukh mud jaun
mujh se mat mil ki zamane ke hawa hun main bhi
Poet of the Poem / Ghazal or Nazam : Mazhar Imam
Yahan se ab kaheen le chal khayal-e-yar mujhe
chaman mein ras na aayegi ye bahar mujhe
teri latif nigahon ke khas jumbish ne
bana diya teri fitarat ka razadar mujhe
meri hayat ka anjam aur kuch hota
jo aap kahate kabhi apna jan-nisar mujhe
badal diya hai nigahon ne rukh zamane ka
kabhi raha hai zamane pe ikhtiyar mujhe
ye hadasat jo hain iztarab ka paigam
ye hadasat hi aayenge sazagar mujhe
‘aziz’ ahal-e-chaman ke shikayat besud
fareb de gai rangini-e-bahar mujhe
Poet of the Poem / Ghazal or Nazam : Aziz Warsi
wohi phir mujhe yaad aane lage hain
jinhen bhulane mein zamane lage hain
wo hain pas aur yaad aane lage hain
muhabbat ke hosh ab thikane lage hain
suna hai hamen wo bhulane lage hain
to kya hum unhen yaad aane lage hain
hataye the jo raste se doston ke
wo pathar mere ghar mein aane lage hain
ye kahana tha un se muhabbat hai mujhko
ye kahane mein mujh ko zamane lage hain
qayamat yaqinan qarib aa rahi hai
‘khumar’ ab to masjid mein jane lage hain
Poet of the Poem / Ghazal or Nazam :Khumar Barabankvi
Tumhari anjuman se uth ke divane kahan jate
jo vabasta hue tum se wo afasane kahan jate
nikal kar dair-o-kaba se agar milta na maikhana
to thukaraye hue insan khuda jane kahan jate
tumhari berukhi ne laj rakh li badakhane ke
tum aankhon se pila dete to paimane kahan jate
chalo acha hua kam aa gai divanagi apni
vagarna hum zamane bhar ko samajhane kahan jate
‘qateel’ apna muqaddar gham se begana agar hota
phir to apane-paraye hum se pahachane kahan jate
Poet of the Poem / Ghazal or Nazam : Qateel Shifai
Tere hote hue mahafil mein jalate hain chirag
log kya sada hain suraj ko dikhate hain chirag
apni maharumiyon pe sharminda hain
khud nahi rakhte to auron ke bujhate hain chirag
bastiyan chand sitaron pe basane wale
kurra-e-arz bujhate jate hain chirag
kya khabar hai un ko ke daman bhi bhadak uthate hain
jo zamane ke hawaon se bachate hain chirag
aisi tarikiyan aankhon mein basi hain ‘faraz’
raat to raat hum din ko jalate hain chirag
Poet of the Poem / Ghazal or Nazam : Ahmed Faraz
