Ye inayaten gazab ke ye bala ke meharabani
meri khairiyat bhi puchi kisi aur ke zubani
mera gham rula chuka hai tujhe bikhari zulf wale
ye ghata bata rahi hai ki baras chuka hai pani
tera husn so raha tha meri ched ne jagaya
wo nigah main ne dali ki sanvar gai javani
meri bezuban aankhon se gire hain chand qatre
wo samajh sake to aansu na samajh sake to pani

Poet of the Poem / Ghazal or Nazam : Nazeer Banarasi

honton pe kabhi un ke mera naam hi aaye
aaye to sahi bar-sar-e-ilzam hi aaye
hairan hain labbasta hain, dilgir hain gunche
khushbu ke zubani tera paigam hi aaye
lamhat-e-masarrat hain tasavvur se gurezan
yaad aae hain jab bhi gam-o-alam hi aaye
taron se saja lenge rah-e-shahar-e-tamanna
maqadur nahi subho chalo sham hi aaye
yadon ke vafaon ke aqidon ke gamon ke
kam aaye jo duniya mein to is naam hi aaye
kya rah badalne ka gila hamsafaron se
jis rah se chale tere dar-o-bam hi aaye
thak har ke baithe hain sar-e-ku-e-tamanna
kam aaye to phir jazba-e-nakam hi aaye
baqi na rahe sakh “ada” dasht-e-junun ke
dil mein agar andesha-e-anjam hi aaye

Poet of the Poem / Ghazal or Nazam :Ada Badayuni